Илоҳийнома. Шайх Фаридуддин Аттор

Чтение книги онлайн.

      745     Дуо этди аёл рост сўйлагач қул,

      Очилди кўзлари, топди даво ул.

      Аноси ўғлини кўрсатди шул дам,

      Гуноҳини яширмай айтди ул ҳам.

      Дедиким, бир аёлдир чорасозим,

      Сотиб олди мени, берди халосим.

      Бошимни айлади дордин халос ул,

      Ва лекин мен уни сотдим, сўзим шул.

      Дуо этди аёл айлаб ниятлар,

      Дуосидин етишди офиятлар.

      750     Жўнатди сўнг уларни тешга, ёлғиз,

      Эрига дедиким, чиқманг, қолинг сиз.

      Юзидин сўнг ниқобин олди, ҳайҳот,

      Эри чун наъра чекди, солди фарёд.

      Кетиб ҳушдин, яна ҳушига келди,

      Аёл шафқат ила бошига келди.

      Не бўлди сенгаким, улмунча қилдинг?

      Нега фарёд чекиб, ерга йиқилдинг?

      Деди: бор эрди бир хотин чу, эвоҳ,

      Уни сенга қиёс этдим баногоҳ.

      755     Ул эрди сендагу сен худди улча,

      Тафовут кўрмагаймен бунда қилча…

      Юзи, қошу кўзи ҳам эрди сендек,

      Бўйи, айтар сўзи ҳам эрди сендек.

      Агар ул ўлмасайди, чун бўлиб хок,

      Сени ул дер эдим, эй гавҳари пок…

      Аёл деди: аёлинг ул, эй одам,

      Хато ҳам этмамишди ҳеч, гуноҳ ҳам.

      Ўшал менман, диним деб жон берибмен,

      Ва лекин ўлмагандирмен, тирикмен.

      760     Балолардин халос этди Худойим,

      Ва менга марҳамат этди шу жойим.

      Этайлик ҳар нафас шукрона юз бор,

      Кўришдик шу ёруғ дунёда дийдор…

      Йиқилди эри, қўйди саждага бош,

      Дедиким, эй Худо, эй Садри наққош!

      Нечук шукрингни айтсин шул забоним,

      Ки ожиз, нотавондир бўйла жоним?

      Чиқиб, сўнг чорлади ҳамроҳларин ул,

      Уларга қиссани арз этди буткул.

      765     Чу қисса сўнгига етган замони,

      Фалакка учди кўнгиллар фиғони.

      Иниси, ул қаро занжий, жавон ҳам38

      Хижолат бўлдилар кўп, шодмон ҳам.

      Аёл гар бошда этмишди хижолат,

      Кечирди, айлади лутфу иноят.

      Эрини этди юртга подшо ул,

      Аъробийни вазири додхоҳ ул.

      Саодат қалъасин қурди Ватанда,

      Ибодат бирла машғул бўлди анда…