Moord in die beloofde land. François Bloemhof

Чтение книги онлайн.

СКАЧАТЬ toe verloop dinge vinniger.

      Van der Linde het reeds skadebeheer toegepas deur sy vrou te verseker daar is niks tussen hom en die meisie nie; hy het ook vir Lehnberg ander werk gekry by Vigus Ortopediese Dienste. Die minnaars baklei al lank, maar hy wil haar nie verloor nie. Nou het sy ’n miskraam. Sy bedank by die nuwe werk en vertel vir Van der Linde dat sy Kaapstad gaan verlaat. Sy wil Johannesburg toe, na haar oom in Bryanston.

      Op 24 Oktober laai sy Choegoe by sy huis in Retreat op en ry met hom na Boston. Hy is gewapen met ’n hamer. Sy laai hom naby Gladstonestraat 66 af, waar mevrou Van der Linde hom gewaar en herken van die vorige kere toe hy in die omgewing was. Sy bel die polisie, wat hom twee blokke daarvandaan oplaai. Hy word by die polisiekantoor geslaan en gewaarsku om uit die area weg te bly.

      Lehnberg vra ’n paar dae later vir Rob Newman, ’n student in ingenieurswese wat in dieselfde losieshuis as sy woon, of sy sy Llama-pistool kan leen. Toe hy weier, vra sy of hy iemand vir haar sal doodmaak. Hy weier weer en Lehnberg maak dit af as ’n grappie.

      Op 28 Oktober verdwyn Newman se pistool uit sy kamer. Hy rapporteer dit en sê dat hy Lehnberg verdink.

      Maandag, 4 November.

      Halfnege daardie reënerige oggend laai Lehnberg vir Choegoe in Retreat op. Haar motor is gepak, want sy is op pad Johannesburg toe, maar eers, sê sy, wil sy hê hy moet saam met haar na die Van der Lindes se huis gaan. Eers toe sy vir hom die Llama-pistool gee, besef hy dat sy nie bloot tot siens wil gaan sê nie.

      Volgens Lehnberg se latere verklaring het sy by Gladstonestraat 66 uit die motor geklim, die voordeurklokkie gaan lui en toe na die motor teruggekeer terwyl Choegoe by die huis in is en die moord gepleeg het.

      Volgens Choegoe se verklaring het hulle alles saam gedoen.

      Sy verklaring word gesteun deur ’n buurvrou, Gloria Marais, wat twee keer binne tien of twaalf minute verby Lehnberg se wit Ford Anglia voor die huis gestap het en albei kere gesien het die motor is leeg.

      Mevrou Van der Linde maak die deur oop, word bang en dreig om die polisie te bel. Sy probeer wegkom, maar Lehnberg pootjie haar en sy val en kap haar kop teen die deur. Terwyl sy op die vloer lê, slaan Lehnberg haar teen die kakebeen met die pistoolgreep. Lehnberg sê Choegoe aan om die half bewustelose vrou te begin wurg, en gee hom dan ’n skêr wat sy van ’n buffetkas af opgetel het.

      Choegoe: “I remember stabbing her three times.”

      Die vrou is sewe keer met die skêr gesteek.

      Volgens Choegoe skiet Lehnberg hom daarna in die gesig met ’n groen kleurstof – van ’n Wepron-gaspistool wat die Van der Lindes met die oog op veiligheid agter ’n portret in die leefkamer gehou het – en sê hy durf nou nie polisie toe gaan nie omdat dit hom skuldig sal laat lyk, en sy sal alle betrokkenheid by die moord ontken. Toe vertrek sy na Johannesburg en kry by Beaufort-Wes twee verkeerskaartjies omdat sy te vinnig gery het.

      Nadat Christiaan van der Linde sy vrou daardie oggend ’n paar keer nie per telefoon kon bereik nie, bel hy hul twintigjarige dogter, Zelda, wat by Tygerberg Hospitaal daar naby werk. Sy tref die huis gesluit aan, maar sien deur ’n venster haar ma op die vloer lê.

      Die polisie vind later sowel die Llama- as die gaspistool in die bruin man se besit.

      Choegoe: “It is very dangerous to just throw pistols away.”

      8

      Soos haar voorgangers, is die Suid-Afrikaanse meisie van die 1970’s grootgemaak om ander te koester. Sy moes ’n tuisteskepper word, met die kombuis as nukleus. Sy moes kon brei. Borduur. Naai. ’n Skêr was iets waarmee sy moes reg- en mooimaak. Elke jong vrou het dit geken, of sy naaldwerk gedoen het of nié: ’n hulpmiddel vir menige huishoudelike taak.

      In Marlene Lehnberg se huis, soos in die meeste ouerhuise, is daar nie oor seks gepraat nie. Soos vele ander onderwerpe was dit nie oop vir bespreking nie en jong mense het daarvan gehoor by maats wat niks beter as hulleself ingelig was nie.

      Omdat daar baie dinge was wat vroue nie toegelaat is om te doen nie, soos om ’n beduidende rol in die kerk te speel, het heelparty aanvaar dat hulle nie sou kon nie. ’n Meisie was beslis nie veronderstel om te vat wat sy wou hê nie. Nog minder kon sy ’n seksuele geskiedenis hê. ’n Vuil verlede sou teen haar tel, dit sou haar definieer. ’n Meisie is stil en op haar plek.

      Seuns kon wel aandag opeis en indien ’n meisie aan ’n spesifieke ou aandag gegee het, kon sy op haar beurt by hom aandag kry. Die meisie het begin aantrek en grimeer nie net om mooi te lyk nie, maar om mooi te lyk vir iemand. Haar liggaam, soveel minder gestroop as dié van die gemiddelde seun, moes met “die regte eetgewoontes” in beheer gehou word.

      Die gewenste optrede kon kwalik beter vasgevat word as in ’n Meisie se pad, ’n handleiding vol reëls en Christelik-nasionale wyshede wat in 1973 verskyn het.

      Byvoorbeeld:

      Tree altyd natuurlik op. Moet nooit koketterig wees nie. Moenie opruiende musiek speel nie en wees tevrede met die haarkleur wat die Skepper jou gegee het – jy sal net jou hare verniel en dit verloor as jy dit kleur.

      Wanneer jy saam met ’n jong man uitgaan, moet jy daarop konsentreer om waarlik vroulik te wees. Moenie ’n hoë stemtoon gebruik nie. Praat gedemp. Hou die gesprek aan die gang deur te reageer op wat jou vriend sê. Moedig hom aan om te praat en vermy die tendens om soos ’n opgewende orreltjie oor jouself te praat – niks skrik ’n man so gou af nie! Gee jou vriend egter ook tyd om te eet. Moenie rondkyk nie, want hy moet trots op jou wees.

      Aan die einde van die aand moet jy vir hom sê watter wonderlike tyd dit vir jou was. Wees opreg en bedank hom met oortuiging.

      Nou vir ’n gevaarlike onderwerp:

      Wees egter versigtig dat dinge tussen julle nie handuit ruk nie. Jong mense wat met intimiteit eksperimenteer, kan hulself geweldige skade berokken. Binne die huwelik kan die seksdrang geluk bring aangesien dit hand aan hand gaan met die liefde wat so ’n daad reinig – maar buite die grense van die eg lei dit liggaam en siel tot verderf.

      Styg bo dit uit! Die meisie wat ’n losbandige lewe lei, se manier van doen is op haar gesig te lese. Die los dame se oë verklap haar, so ook haar manier van sit en loop. Só ’n meisie kan maklik deur enigeen geëien word.

      Maar hoe dan gemaak as die passie te hoog begin loop? Hoe keer ’n meisie dat sy ’n “los dame” word?

      ’n Man word soms gelei deur sy drange, maar ’n ordentlike meisie moet weet hoe om dit te weerstaan sonder om hom te affronteer. Die situasie is in jou hande en ’n man kan verder probeer gaan as wat betaamlik is. Beheer die oomblik op verantwoordelike wyse, maar sonder dat hy dit besef. Waak teen oormatige liggaamlike nabyheid omdat dit so maklik die gevoelens van passie kan aanwakker. As die gevaarligte wel brand, verskoon jouself om tee te gaan maak.

      Goeie ou tee. Altyd ’n slim roep.

      Deur te speel met die patriargale samelewing se rolle, kon ’n uitgeslape meisie egter nog altyd ’n man kry om onaangename take namens haar te verrig. Só kon hy haar motorwiel omruil, want sy is mos nie meganies aangelê nie. ’n Waarderende woordjie of bewonderende blik sou hom gevlei laat voel, terwyl die meisie pas bewys het dat sy nie net slimmer as hy is nie, maar ook sterker – sy het daardie swaar werk afgehandel met ’n blote glimlag.

      Nog СКАЧАТЬ