Op vlerke van geloof. Solly Ozrovech

Чтение книги онлайн.

СКАЧАТЬ wonderlik is die bevryding wat U skenk, my Here en my Verlosser! Dankie dat ek my sonde en nood by U kan uitsnik as ’n voorspel tot die sing van oorwinningsliedere.

      27 Januarie

      Christus is met ons

      LEES Jesaja 40:12–31

      Die Here is die ewige God … Hy gee die vermoeides krag, Hy versterk dié wat nie meer kan nie … dié wat op die Here vertrou, kry nuwe krag. – Jesaja 40:28–31

      Eensaamheid en ’n gevoel van Godverlatenheid is een van die magtigste wapens van Satan. Daardeur dryf hy ons tot moedeloosheid en terneergedruktheid. Ons kan hierdie aanval van Satan weerstaan deur gelowig te wag op God wat ons in Jesus Christus in ons nood tegemoetkom en deur sy ewige Woord aan ons die versterking gee dat God omgee.

      Eensaamheid het baie gesigte. Daar is eensaamheid binne die huwelik; die eensaamheid van afsondering; van die ouderdom; van verandering; en dan ook daardie laaste groot eensaamheid – die eensaamheid van die dood.

      Die oplossing vir alle eensaamheid vind ons by Christus, die groot Eensame. Hy wat eenmaal Self sy Godverlatenheid moes uitsnik, sodat Hy vir jou en my kan sê: Ek is met jou al die dae. Ek sal jou nie begewe en jou nie verlaat nie. Met Hom in jou lewe word jou eensaamheid nie alleen getemper nie, maar word jou hart verbly!

      GEBED

      Dankie, hemelse Vader, dat U my nooit verlaat nie; dat U altyd dieselfde is. Dankie dat U alles weet, dat U omgee en magtig is om te doen ver bo wat ons kan bid of dink.

      28 Januarie

      In stilwees en vertroue

      LEES Jesaja 30:8–18

      As julle julle bekeer en tot rus kom, sal julle gered word. Julle krag lê in stil wees en vertroue hê. – Jesaja 30:15

      Hoe hanteer ’n mens spanning wat in jou opbou?

      • Begin by die verlede. Moenie die verlede soos ’n ondraaglike las met jou saamsleep nie. Christus het immers beloof om alles “nuut” te maak. Hy werp jou verlede in die dieptes van die see.

      • Moenie opkrop nie. Praat jou probleme op ’n volwasse wyse uit met jou lewensmaat, ’n getroue vriend of ’n pastorale raadgewer.

      • Soek ’n toevlugsoord van stilte en kalmte vir jou gees – ’n plek waar jy alleen met jou Skepper kan verkeer om weer perspektief op die lewe te kry. Jy sal voel hoedat die spanning uit jou gees wegdreineer.

      • Hou vas aan God se heerlike beloftes. Wanneer ons nie verder kan nie, weet God wat die beste is.

      • Moenie verval in neerslagtigheid nie. Doen iets positiefs. Gaan uit in die wêreld en sien die nood van ander raak.

      • Leef binne jou beperkings. Wees eerlik met jouself. Praat met God in gebed. Deel alles met Hom en vind só vrede en gemoedsrus.

      GEBED

      Ek dank U, Heer, vir die wete dat ek te midde van die druk wat soms orkaansterkte bereik, ’n plek van stille kalmte by U vind.

      29 Januarie

      Leer om te luister

      LEES 1 Samuel 3:1–18

      Praat, Here, u dienaar luister! – 1 Samuel 3:10

      Om na God te luister is nie so maklik nie. Hy praat nie met ons in ’n hoorbare stem nie. God het in die ou tyd direk met mense soos Samuel gepraat, maar vandag hoor ons God se stem langs ander weë.

      Die eerste en belangrikste vereiste is om by God uit te kom. Dit doen jy in uiterste geloof en vertroue. Praat openhartig met jou hemelse Vader en dink daaraan dat Hy jou beter ken as wat jy jouself ken. Lê jou lewe aan Hom bloot en deel elke nietige aspek daarvan met Hom.

      As jy getrou en volhardend bid, sal jy verrykende oomblikke ondervind. Dan sal gesprek onnodig wees en dit sal vir jou heerlik wees om slegs naby God te wees. Gedurende hierdie pragtige oomblikke vra jy van Hom niks nie, maar is jy tevrede om slegs soos ’n loot aan die Wingerdstok te hang.

      Gedurende hierdie heilige oomblikke van stilte, kan die Hoorder van gebed sy heilige afdrukke op jou gees maak. Jy mag onverwags ’n gedagte ervaar wat so helder en eg is, dat jy nie kan twyfel dat dit God se boodskap aan jou is nie.

      Daar is ryke seën wat wag vir hulle wat geleer het om met ’n sensitiewe oor na God te luister!

      GEBED

      Heilige God, leer my om te luister sodat ek saam met Samuel kan sê: Praat, Here, u dienaar luister! Dankie dat Jesus Christus dit vir my moontlik gemaak het.

      30 Januarie

      God van dié wat alleen agterbly

      LEES Psalm 94:12–23

      Toe ek gedink het my voete gly, het u troue liefde my regop gehou, Here. – Psalm 94:18

      Die een wat agterbly ná die dood van ’n lewensmaat is mateloos eensaam omdat sy of haar lewensmaat, geselskap en vertroueling weg is. Die eensaamheid word erger omdat niemand eintlik hierdie verlatenheid verstaan nie. Jy is alleen in die storms, alleen met groot besluite, met feesgeleenthede, alleen met jou smart, alleen in tye van siekte en nood.

      By wie kla jy? Met wie deel jy jou lewensvreugdes en die ervarings van die dag? Môre hou skielik geen opwinding meer in nie. In die nag steek jy jou hand uit om ouder gewoonte jou geliefde aan te raak, maar sy of haar plek is leeg.

      Die oplossing vir hierdie eensaamheid lê in jou verhouding met God. Geseënd is hy of sy wat kan sê: “Toe ek met baie onrus in my binneste sit, het u vertroosting my tot rus gebring” (vers 19).

      Vertrou God met jou eensaamheid én jou toekoms. Hy sál voorsien. Lewer jou bydrae tot die lewe. Deur voorbeeld en diens kan jy God se koninkryk help bou en ander se nood en smart verlig. Só sal jy oorwinnend uit jou krisisuur kom.

      GEBED

      God van eensames, U het ons geleer dat ons krag sal vind in stilwees en vertroue. Skenk my in hierdie donker oomblikke daardie krag.

      31 Januarie

      Wees gehoorsaam

      LEES 1 Samuel 15:16–25

      Nee, gehoorsaamheid is beter as offerande, om te luister is beter as die vet van ramme. – 1 Samuel 15:22

      Gehoorsaamheid is beter as offerande. Dit was die lewensles wat Jona moes leer voordat hy vir die Here diensbaar kon wees: “Die woord van die Here het tot Jona … gekom. Maak klaar, gaan na die groot stad Nineve … Maar Jona het klaargemaak om na Tarsis toe te vlug …” (Jona 1:1–3).

      Baie mense doen vandag nog presies wat Jona gedoen het. Hulle weet wat God van hulle verwag en wat sy wil vir hul lewe is, maar hulle probeer sy plan met hul lewe fnuik.

      Soms is die pad wat die Here wil hê ons moet bewandel duidelik uitgestippel; soms is dit moeilik om te aanvaar en te verstaan. Miskien wil jy God se pad nie loop nie omdat jy nie genoeg selfvertroue het nie of omdat jy bang is vir wat op daardie pad met jou kan gebeur.

СКАЧАТЬ