Op vlerke van geloof. Solly Ozrovech

Чтение книги онлайн.

СКАЧАТЬ

      Dankie, Meester, dat te midde van die gejaagdheid van die lewe ek nie van U hoef los te raak nie. Skenk aan my u vrede.

      22 Januarie

      Lig in die duisternis

      LEES Johannes 1:1–18

      In Hom was daar lewe, en dié lewe was die lig vir die mense. Die lig skyn in die duisternis, die duisternis kon dit nie uitdood nie. – Johannes 1:4–5

      Die lewe kan skielik stikdonker lyk weens probleme of hartseer. Jy is onseker en vind dit so moeilik om die duisternis te hanteer, dat jy selfs nie die hulpmiddels wat God tot jou beskikking stel, doeltreffend kan gebruik nie.

      Daar is mense wat die duisternis triomfantlik oorwin deur Christus wat hulle in staat stel om uit die donkerte die lig te betree. Jesus is die ware lig wat elke mens verlig (vgl Joh 1:9). Wanneer jou pad onseker is en jy moeilike beslissings moet maak, lei Christus jou tree vir tree uit die duisternis van droefheid en verwarring tot in sy wonderbare lig.

      Die ligstrale van God se liefde omvou jou; Hy beskerm jou teen gevare waarvan jy onbewus is. In tye van droefheid en smart hou Hy liefdevol oor jou die wag. Draai daarom in tye van nood jou gesig na die Lig toe. In Christus lê oorwinning en stralende blydskap en deur Hom groei ons seënryk in die volle sonskyn van God se onmeetlike liefde.

      GEBED

      Help my, liefdevolle Christus, om moedig en verstandig die lig te betree waarmee U my lewensweg bestraal. Ek plaas my hand vertrouend in u hand – lei my in u lig.

      23 Januarie

      Volg waar God lei

      LEES Psalm 32

      Ek wil jou onderrig en jou die pad leer wat jy moet volg. Ek wil jou raad gee en my oog oor jou hou. – Psalm 32:8

      God lei diegene wat hulle volle vertroue in Hom plaas. Met hierdie wete kan jy elke veeleisende dag en onbekende nag binnestap.

      Wanneer ons jubel dat God ons Leidsman is, beoefen ons nie verstandelike gimnastiek nie, maar die wesenlike lewenservaring van duisende wat ’n aktiewe lewe vir Hom lei.

      Die eerste voorvereiste vir Gods leiding in ons lewe is absolute en volkome oorgawe aan Hom. ’n Mens maak tog nie van iemand ’n leidsman indien jy nie onwrikbare vertroue in hom stel nie.

      Dit moet gevolg word deur gedurige kommunikasie met God. Daaarom is gebed en meditasie so noodsaaklik. Van jou kant moet jy ook jou deel doen. God sal die deur oopsluit, maar jy moet self die deurknop draai.

      Dit verg moed om Hom konsekwent en gelowig te volg; om dit stap vir stap te doen sonder om die eindpunt te sien; om die oortuiging te behou dat dit God se pad en God se wil is. Maar doen dit – jy sal verbaas wees om te sien hoe sy heilige wil in jou lewe ontvou.

      GEBED

      Here, U is vir ons ’n toevlug en ’n sterkte. As hulp in ons benoudheid het U Uself nog altyd trou bewys. Maak my sensitief om u wil vir my lewe te ken en skenk my die genade om dit te volg deur die liefde van Christus.

      24 Januarie

      God ons Rots

      LEES Hebreërs 13:7–19

      Jesus Christus is gister en vandag dieselfde en tot in ewigheid. – Hebreërs 13:8

      In hierdie tyd van snelle veranderinge en al die uitdagings wat daarmee gepaardgaan en wat eise aan ons stel, soek ons ’n standhoudende middelpunt waaraan ons ons lewe kan koppel. Hierdie middelpunt vind ons in ons God.

      Hier op aarde verander alles. Omstandighede wissel mekaar vinnig en onverbiddelik af: stilte en storm; sonskyn en wolke; gesondheid en siekte; lewe en dood. Net Jesus Christus, ons Verlosser, verander nooit nie. In Hom het ons ’n Rots wat onwankelbaar vas bly staan.

      Deur die verbysterende veranderinge in ons lewe het ons miskien baie skade gely, maar as ons verlies ons by die Here uitgebring het, gestroop van alle uiterlike en oortollighede, besit ons nou veel meer as wat ons verloor het.

      God laat soms ’n stormwind opkom om ons van alle aardse hulp te laat afsien en ons toevlug te neem tot Hom – die Rots op Wie ons ons lewe kan bou met sekerheid.

      GEBED

      My Here en God, ek dank U dat ek kan sê: My tye is in u hand. U is vir my ’n skuilplek; U is die ruspunt van my hart te midde van al die veranderinge van die wêreld.

      25 Januarie

      Eien Christus se vrede vir jou

      LEES Lukas 24:36–49

      Terwyl hulle nog oor hierdie dinge praat, staan Jesus self meteens daar tussen hulle en sê vir hulle: “Vrede vir julle!” – Lukas 24:36

      Die lewe is vol ondervindings wat jou gespanne maak. Jy word humeurig en onvergenoeg – omdat jou vrede daarmee heen is. In sulke spanningsituasies is dit noodsaaklik om innerlike reserwes op te bou waaruit jy krag kan put. Die belangrikste kragbron in só ’n tyd is die vrede wat Jesus Christus gee aan almal wat Hom liefhet en dien en in gehoorsaamheid naby Hom leef. Die wonderlikste is dat hierdie vrede beskikbaar is vir elkeen wat gewillig is om Christus te volg.

      Wanneer spanning begin opbou, moet jy doelbewus weier om jou te laat meesleur. Waak teen humeurigheid en geïrriteerdheid. Moenie deel word van die gejaagdheid van die massa rondom jou nie. Dwing jouself tot rustigheid. Sonder jou af met Christus. Dit hoef net enkele minute te wees, maar dóén dit. Bevestig weer jou afhanklikheid van Hom en glo dat sy vrede vir jou beskikbaar is en neem dit dan vir jou.

      Spoedig sal jou moeë, gejaagde gees tot bedaring kom en Christus se vrede sal jou lewe verfris. Jy sal ’n vrede in jou hart vind wat niks en niemand van jou kan wegneem nie. Jy sal jou Meester hoor sê: “Vrede vir jou!”

      GEBED

      Heilige God, bring my te midde van die gejaagdheid en spanning van die lewe van elke dag by waters waar daar vrede is.

      26 Januarie

      ’n Nuwe lewe in Christus

      LEES Psalm 32

      Toe het ek my sonde bely, my oortreding nie weggesteek nie. Ek het gesê: “Voor die Here bely ek my opstandigheid;” en U het my skuld vergewe. – Psalm 32:5

      Ons leef in ’n gebroke en sondeverskeurde wêreld. Daar is soveel bedreigings, soveel versoekings. Telkens word ons tot neerslagtigheid gedwing en sit ons vasgevang in die web van die sonde. Daar is egter ’n pad uit hierdie ellende: Jesus Christus.

      As jy by Christus uitgekom en jou sonde bely het, vergeet die mislukkings en teleurstellings van die verlede en reik uit na die nuwe lewe in Christus Jesus. Vergeet jou skande en aanvaar jou kindskap van die Koning. Vergeet die neerlae en volg Christus op die pad van oorwinning. Hou jou oë gevestig op Hom, jou Leidsman en die Voleinder van jou geloof.

      God is genadig en sy genade is in alle omstandighede vir jou genoeg. As jy gelowig die stryd teen die sonde stry in sy kragtige Naam, sal jy die oorwinning smaak. Dan stap jy die toekoms met al sy bedreiginge met waagmoed tegemoet, met ’n lied van bevryding in jou hart en op jou lippe.

      GEBED

СКАЧАТЬ