Uit die Beek 2012. Attie van Wijk

Чтение книги онлайн.

СКАЧАТЬ lidmate. Die apostels het eers in Jerusalem agtergebly en eers heelwat later ook die wêreld ingevaar om die evangelie te gaan uitdra.

      Dit is interessant om op te let dat iets soortgelyks ook hier in Suid-Afrika aan die gang is. Terwyl dinge nog maklik gegaan het, het min van ons daaraan gedink om na die buiteland te gaan om die evangelie uit te dra. Maar toe dinge moeilik begin raak as gevolg van misdaad en regstellende aksie, het duisende Suid-Afrikaners na ander lande uitgewyk. Daar het hulle by die plaaslike gemeentes ingeskakel en sommer gou daar begin leiding neem. Ander het gaan werk soek in lande wat heeltemal vir sendelinge gesluit is. Vandag is daar duisende Christene in die 10-40-venster waar die mees onbereikte volksgroepe woon. Is dit toevallig, of is dit die Here wat besig is om sy koninkryk ook daarheen uit te brei?

      GEBED: “Here, vergewe ons ons ongehoorsaamheid aan u groot opdrag. Help my om my deel ten volle te doen.”

      Lees vanaand in Handelinge 8:5–8 wat in Samaria gebeur het toe ’n diaken sy geloof begin uitleef.

      Donderdag 15 Maart

      Lees Handelinge 8:9–17.

      Onverwagte bekeerling

      Selfs Simon het gelowig geword (Hand 8:13).

      “Hoe weet ’n mens of iemand werklik tot bekering gekom het?” is ’n vraag waaroor elke leraar (en gelowige) soms wonder. So baie jongmense gaan deur die kategese en verseker die gemeente plegtig dat hulle waarlik die Here Jesus aangeneem het en dat hulle voortaan vir Hom wil lewe. Maar die Sondag nadat hulle belydenis van geloof afgelê het, is hulle afwesig by die erediens. Was dit vir hulle dan ook maar net ’n “boerematriek” wat hulle gedoen het omdat hulle ouers dit wou hê? Was dit dan nie eg nie? Baie van ons lidmate getuig dat hulle eers jare later werklik tot oorgawe gekom het.

      Simon die Towenaar was ’n kulkunstenaar wat die mense van Samaria jare lank mislei het. Hulle het vas geglo dat hy “Die Groot Krag van God” was. Hy het ’n groot aanhang gehad. Maar toe die eenvoudige diaken Filippus daar begin werk en die mense egte wonderwerke beleef, het sy aanhang gekwyn, en hy is self ook oortuig om ’n Christen te word. Hy het oral saam met Filippus gegaan. Hoe eg sy bekering was, is moeilik om te sê, want hy het gedink hy kon hierdie krag koop, soos ons vanaand sal sien. Hy was veral beïndruk toe hy sien hoe Petrus en Johannes mense kon help om die vervulling deur die Heilige Gees te ervaar.

      Wat beteken dit dat die mense die Heilige Gees eers deur die apostels kon ontvang? As iemand tot geloof kom, is dit tog reeds die werk van die Heilige Gees, en almal wat aan Jesus behoort, het reeds die Heilige Gees (Rom 8:9). Hier is duidelik iets ter sprake wat gesien kon word, en daarom was dit waarskynlik tekens soos die spreek in tale of genesingswonders.

      GEBED: “O Heilige Gees, vervul my weer! Ek wil toegerus wees vir die werk wat U vir my het.”

      Lees vanaand in Handelinge 8:18–25 hoe sterk Petrus vir Simon aanspreek en hoe hy hom tot bekering roep.

      Vrydag 16 Maart

      Lees Handelinge 8:26–31.

      Luister nou mooi!

      “Gaan loop saam met daardie wa” (Hand 8:29).

      “Verstaan ek die Here reg dat ek hierdie wonderlike herlewing in Samaria moet verlaat en in die suide langs ’n eensame pad moet gaan sit?” het Filippus seker gewonder. Ons lees dat ’n engel vir hom die opdrag gegee het. Was dit in ’n droom? Was dit ’n engel in die vorm van ’n gewone mens? ’n Mens sou graag langs Filippus wou gaan sit en hom uitvra presies hoe die Here met hom gepraat het, en hoe hy geweet het dit is die Here se opdrag. Een ding is seker: Hy was gewillig om ten alle koste gehoorsaam te wees.

      Terwyl hy toe daar langs die woestynpad sit, sien hy ’n stoffie aankom. Dit was ’n lang slap amps-ossewa, met Etiopië se minister van finansies daarin. En dadelik het Filippus geweet dat die Heilige Gees hom aansê om by daardie geselskap aan te sluit (Hand 8:29). Hy het nie getwyfel nie. Hy het selfs gehardloop om die wa in te haal, en het by presies die regte vers uit Jesaja die minister in die rede geval. Die minister het van die God van Israel gehoor en Hom kom aanbid, maar was nie eens toegelaat om in die tempel in te gaan nie, omdat hy ontman was. Maar hy het darem ’n stukkie Bybel te koop gekry. En op die regte oomblik kom die teksvers, die leser en die boodskapper by mekaar uit. Wat ’n wonderlike en ingewikkelde organisasie het dit nie gekos nie! Net God kan dinge so netjies reël!

      Dit is wonderlik om te hoor hoe God vandag nog sulke afsprake reël vir sy kinders wat ingestel is om sy stem te hoor. Het jy dit ook al so ervaar?

      GEBED: “Here, help my om u opdragte duidelik te hoor en te gehoorsaam.”

      Lees vanaand in Handelinge 8:32–40 hoe die minister die Here Jesus aanneem en met blydskap teruggaan Afrika toe.

      Saterdag 17 Maart

      Lees Handelinge 9:1–9.

      Ek is Jesus

      “Dit is vir My wat jy vervolg. Maar staan op en gaan na die stad toe. Daar sal vir jou gesê word wat jy moet doen” (Hand 9:5–6).

      “Wie is die laaste persoon wat jy sou verwag om tot bekering te kom?” Jy kan seker aan so ’n persoon dink. Die grootste vyand van die Christendom? Die mees uitgesproke ateïs? Die wreedste Christenvervolger? Die ryk man wat almal uitbuit en onderdruk vir sy eie voordeel? Saulus van Tarsus?

      Saulus was so seker dat hy op die regte pad is. Hy het mos die beste teologiese opleiding gekry, by professor Gamaliël. Hierdie Jesus wat glo gesê het dat Hy en God een is, was mos duidelik ’n dwaalleraar. Die stories van sy volgelinge dat Hy weer uit die dood opgestaan het en na die hemel toe opgevaar het, kan tog nie waar wees nie. Hy het met mag teen hierdie “dwaalleer” opgetree en mans en vrouens in die tronk gestop. Ons hoor nie wat van die kinders geword het wat sonder versorging gelaat is nie. Saulus was die regte man vir die oomblik. Hy sou die suiwere leer handhaaf.

      Maar tydens sy woestynreis het hy kans gekry om te dink. Waarvoor leef hy? Vir God, of vir homself? En toe hy skielik met die lewende Jesus te doen kry, is sy lewe totaal verander. Nou het hy nie meer getwyfel of Jesus lewe nie. Van nou af wou hy vir Christus lewe (Fil 1:21). Waar hy Christene vervolg het, word hy nou self vervolg. Waar hy die evangelie wou uitroei, word hy nou self die grootste sendeling. Is die genade van die Here Jesus nie verrassend groot nie? Hierdie selfde lewende Jesus werk ook in en deur jou en my. Wonderlik!

      GEBED: “Here Jesus, dankie dat U lewe, en dat U uit genade ook na my toe uitgereik het.”

      Lees vanaand in Handelinge 9:10–16 hoe Ananias die opdrag van die Here gehoorsaam, al maak dit nie vir hom sin nie.

      Sondag 18 Maart

      Lees Psalm 40:14–18.

      Vyfde Lydensweek

      Die beste helper

      Ek is hulpeloos en arm, maar die Here dink aan my. U is my hulp en my redder; my God, moet tog nie talm nie! (Ps 40:18).

      “Ai Meneer, ons het van De Aar af gekom om werk te soek, maar daar is niks werk nie, en die kinders is honger,” verduidelik die hulpsoeker by die voorhekkie. Hy is een van duisende wat in hierdie dae hulpeloos en arm voel, terwyl al hoe meer fabrieke moet sluit en plaaswerkers hulle werk verloor as gevolg van die nuwe wetgewing. Wat maak ’n mens in sulke omstandighede?

СКАЧАТЬ