Kan ek maar aan jou selluliet vat?. André le Roux

Чтение книги онлайн.

СКАЧАТЬ

      Só lyk ’n ereksie wat meubels kan verskuif

      A hard man is good to find.

      – Mae West

      I think that testosterone is a rare poison.

      – Germaine Greer

      Moenie met ’n man se testosteroon peuter nie.

      Dis sý hormoon.

      Dis sy manlikheid, dis sy enjin en sy spiere. Dit vuur hom aan. Dis waarvan sy libido afhang. Dit word in sy testes vervaardig en hou verband met aggressie en die wil om te wen.

      ’n Man se wil om te wen is groter as ’n vrou s’n, al wil sy die laaste woord in ’n onderonsie inkry. Die vrou doen dit omdat dit een van die min maniere is waarop sy haarself kan verdedig. Hy is immers groter en sterker as jy, en hy verdien na alle waarskynlikheid meer geld as jy.

      Vroue is nou eenmaal beter vredemakers en helers van die wêreld as mans. Mans wil helde wees, oorwinnaars – van sport tot sake. G’n wonder klein seuntjies wil brandweerman of Springbok-rugbyspeler word nie. Hulle wil die wêreld verower met ’n swaard of ’n straalgeweer, die held in sy eie videospeletjie.

      Navorsers (2008) het bevind testosteroon beïnvloed Londense aandelemakelaars. Dié met ’n hoër testosteroonvlak se kans was beter om ’n wins te maak omdat hulle aggressiewer, meer selfversekerd en nie bang was om te waag nie.

      Terwyl kortisoon, daardie streshormoon, hul kollegas met ’n laer testosteroonvlak versigtiger gemaak het.

      Ook, toe hulle vir die makelaars foto’s van kaal meisies gewys het, was die makelaars meer geneig om kanse te waag as ná foto’s van gewone goed soos ’n kramdrukkertjie. Boonop het hulle agtergekom geld en vroue aktiveer dieselfde area in ’n man se brein. (Is dit nie wat mans najaag nie? Geld en vroue …?)

      En wanneer die makelaar wen, styg sy testosteroonvlak terwyl die verloorder s’n daal. Maar ná ’n rukkie … wat gebeur? Die effek neem af en die wenner maak dom finansiële besluite.

      Dus: Wanneer die aandelemark styg, styg die makelaars se testosteroonvlakke. Wanneer die mark val, styg net hul kortisoonvlakke, hulle raak gestres. En niemand kan rasionele besluite neem nie. (Kies dus vir jou ’n aandelemakelaar wat sy stresvlak kan beheer.)

      ’n Hoë testosteroonvlak is al in verband gebring met impulsiewe besluite, swak akademiese prestasie, en ongeduld, selfs psigopatie. In ’n studie in 2006 is bevind dit kan breinselle doodmaak.

      Daardie onaangename vent se testosteroonvlak is gewoonlik hoog. Jy gaan nie weet of sy testosteroonvlak “abnormaal” hoog is nie. Sê nou hy’s ’n psigopaat? Maar jy gaan jou nie steur aan wat mense sê nie (pienk-lens-effek). Kan hulle nie sien hy’s net die stil, sterk tipe nie?

      Sielkundiges sê jy moet dus dophou hoe ’n man mededingende situasies buite jul verhouding hanteer. Hy gaan dit binne die verhouding voortsit. En manlike oorheersing in ’n verhouding kan die magsbalans versteur en probleme skep. Dit word al hoe meer sosiaal onaanvaarbaar. Magsbalans in ’n verhouding is inderdaad bevorderlik vir harmonie. (Ook ’n wanbalans kan goed wees – jy moet alles doen en hy sit voor die TV, baie patriargaal – mits dit deur albei partye so aanvaar word.)

      Volgens ’n Britse studie (2009) het testosteroon dalk net ’n slegte reputasie dat dit aggressie aanhelp. Dis eintlik ’n “regverdige” hormoon wat eerder daarop ingestel is om ’n man se status te bevorder. Die navorsers het bevind mense tree aggressief op omdat hulle dínk dis weens testosteroon: Vróúe is ekstra testosteroon gegee en ’n kontrolegroep net plasebo. Hulle moes geld verdeel. Vroue met die ekstra testosteroon het die geld regverdiger verdeel. Die plasebo-groep was aggressiewer en het die geld deurgaans onregverdig verdeel.

      Die eerste groep vroue is direk gevra hoe testosteroon hul gedrag verander het. Die meeste het gesê dit het hulle aggressiewer en antisosiaal gemaak, maar dit was die plasebo-groep wat aggressief en onregverdig was. Testosteroon dra dus ’n persepsie van aggressie omdat almal weet dis ’n manlike hormoon en mans word met aggressie geassosieer.

      As jy testosteroon in aksie wil sien, gaan na ’n rugbywedstryd – en kyk na die pawiljoen. Vrouetoeskouers het inderdaad ook ’n bietjie testosteroon, maar mans het 40 tot 60 maal meer. En dit is so dat mans se seksdrang hoër as vroue s’n is, was nog altyd so gewees vanweë die testosteroon. (Mans het op hul beurt ook ’n bietjie estrogeen.)

      ’n Man se testosteroonvlak is op ’n hoogtepunt in sy adolessensie en vroeë volwasse jare. Sy ereksie is so sterk dit kan meubels verskuif (hoewel dit baie vreemd sal lyk). Seks gaan nooit weer so snaarstyf wees soos toe hy 20 was nie. Party bronne sê 18, ander 22. Dis wanneer ’n man se testosteroon op ’n hoogtepunt is. Terwyl ’n vrou se hoogtepunt eers hier rondom 30 kom.

      Jy’t in elk geval heelwat minder testosteroon nodig as hy om die lewe te geniet. By jou is daar ook estrogeen en progesteroon betrokke, tipies vroulike hormone. En eksperimente met testosteroonplakkers om Viagra vir vroue te vind is daarop gemik om jou sogenaamde hipoaktiewe seksuele-begeerte-steurnis (HSBS) te verbeter.

      “Ek’s nie lus nie, man!”

      Die definisie van HSBS is min of meer: ’n Gebrek aan of afwesigheid van seksuele fantasieë en begeerte om seks te hê oor ’n tydperk. Al hoe meer navorsing word gedoen oor sogenaamde flibanserien om Viagra vir vroue te vind. Dis ’n middel wat ontwikkel is teen depressie, waarvoor dit toe nie gewerk het nie. Maar toe kom hulle agter dit help vir vroue met ’n lae libido.

      Blykbaar sukkel 1 uit 10 vroue, selfs 1 uit 3, daarmee. Weer eens wissel die statistieke. ’n Vrou se seksdrang wissel vanselfsprekend na gelang van haar ouderdom, pre- of postmenopousaal.

      ’n Meningspeiling in Londen (2003) het getoon 40% van vroue het HSBS, maar vir net 25% van daardie vroue was dit ’n probleem. Die res het nie omgegee nie, of hulle het eenvoudig daarby aangepas.

      ’n Man se testosteroon kan gemeet word in minute: Sit ’n man in ’n vertrek saam met ’n vrou wat hy nog nie vantevore ontmoet het nie, selfs al vind hy haar nie juis aantreklik nie, en in net 4,9 minute skiet sy testosteroonvlak gemiddeld met 8% op, volgens Hollandse navorsing (2008). In daardie 4,9 minute het die man se skouers skielik netjies agteroor gestrek, hy staan mooi regop, maag in, en hy beduie met sy hande. (Seker om sy punt te bewys.)

      Ander navorsers meen die styging van testosteroon in ’n man se speeksel wanneer hy ’n aantreklike vrou sien – sy mond begin letterlik water (bl. 24) – is vanweë natuurlike feromone.

      Gelukkig is ’n snaarstywe ereksie – wat meubels en berge kan versit – nie nodig vir bevredigende seks nie. Styf is goed genoeg, maar dan moet dit behoorlik styf wees. Die wêreldwye Pfizer Global Better Sex Survey (GBSS, 2006) het ’n verband agtergekom tussen die hardheid van ’n ereksie en bevredigende seks – hoe stywer hoe beter vir man én vrou. (Pfizer is die farmaseutiese maatskappy wat onder meer Viagra maak.)

      En volgens 91% van mans en 85% van vroue in die studie, wêreldwyd, is goeie seks noodsaaklik vir ’n goeie verhouding.

      Mite 11: Mans dink elke 7 sekondes aan seks

      Wie’t getel?

      Natuurlik dink hy elke dag aan seks, dikwels meer as een keer, soms heeldag lank in sy jeukerige adolessentejare met ’n oordosis testosteroon en drome oor sy Afrikaans-onderwyseres.

      Maar elke 7 sekondes?

СКАЧАТЬ