Duet. Johan Ferreira

Чтение книги онлайн.

СКАЧАТЬ van die liefde.

      Deel ek my lewe diep en betekenisvol met my maat?

      Jesus, dankie dat U alles met ons deel. Gee dat ek U as voorbeeld sal gebruik in my verhouding met my huweliksmaat. Amen

      19 Maart

      Kies saam ’n nuwe pad

      Handelinge 5:1-2 – Daar was egter ook ’n sekere man, Ananias, wat saam met sy vrou, Saffira, ’n eiendom verkoop het. Hy het met die medewete van sy vrou van die verkoopprys vir hulleself gehou en net ’n gedeelte daarvan gebring en vir die apostels gegee. (NLV)

      Foute en verkeerde besluite is deel van die lewe. Dit is egter ’n heel ander saak as ons bewustelik ’n optrede kies wat verkeerd, onwettig of meetbaar skadelik sal wees. As ons as huwelikspaar mekaar ondersteun in ’n verkeerde besluit, is die gevolge meetbaar sleg. Daar gebeur iets in die verhouding wat respek vir mekaar aantas en besoedel. Hoewel albei mekaar ondersteun het in die keuse, kan een van die twee dalk later die ander een aankla vir daardie fout.

      Die huwelik is deur God ingestel om twee mense ’n plek van veiligheid te gee. Die twee moet nou kies om hierdie plek van veiligheid te bou en te onderhou. Hierdie verhouding word die fondament van hul lewe saam. Dit kan nie bly voortbestaan sonder voortdurende verbintenis met mekaar nie. Kommunikasie is die gom wat die struktuur van die verhouding aan mekaar hou en eerlikheid beskerm die integriteit daarvan.

      As ’n huwelikspaar ’n meetbare fout begaan het, is dit natuurlik nie die einde van die pad nie. God gee die duidelike plan om weg te kom van foute en oor te begin met nuwe gedrag en denke. Om die eenheid in die huwelik te herstel moet die paar saam tot inkeer kom. Erken die fout aan mekaar. Doen die belydenis voor God en mekaar. Laat staan dan die ou gedrag. Kies saam ’n nuwe pad en bly daarop. Leef na aan God en mekaar.

      Kommunikeer ek en my maat eerlik oor ons besluite met mekaar?

      Jesus, help ons om in eerlikheid met mekaar en U te leef. Amen.

      20 Maart

      Vat God saam wanneer jy verhuis

      Rut 1:1 – In die tyd toe die rigters in Israel opgetree het, het ’n man uit Betlehem in Juda uit die land weggetrek omdat daar ’n swaar hongersnood in die land was. Hy en sy vrou en twee seuns het in die land Moab gaan woon. (NLV)

      Mense gaan woon in ander stede of lande. Ons ken almal iemand wat na ’n ander land getrek het om na ’n beter toekoms te gaan soek. En natuurlik is daar gesinne wat oor die land heen verhuis vir verskillende redes.

      Elimelek en Naomi neem hul twee seuns en gaan woon in Moab. Die seuns trou met vroue uit daardie land en Elimelek sterf ook daar. Dit klink soos die gang van tyd vir ’n gesin wat die toekoms elders gevind het. Die gesin het as eenheid gegaan en as eenheid ’n nuwe blyplek gevind.

      God sien die huwelik as plek van eenheid en die gesin as die grondgebied waar kinders groei en leer. Gelukkige gesinne bou ’n gelukkige gemeenskap. Of jy nou Lydenburg of Londen toe trek, vat jou maat en jou kinders saam. Daar bestaan ’n baie groter kans op sukses as die gesin as eenheid die uitdaging aandurf.

      Verandering is dikwels ’n negatiewe uitdaging. Die bekende hou ’n element van veiligheid en voorspelbaarheid in. As die uitdaging van verhuising oor die pad van die gesin kom, plaas dit die kollig op die gehalte van die verhoudings. Die druk van die verandering sal die moontlike krake daarin belig.

      Hoe nader ons aan God leef, hoe meer weet ons Hy leef saam met ons in die nuwe stad. Hy leef ook in ander lande!

      Leef ons waarlik as eenheid in ons gesin en verhouding?

      Vader, wees U die element in ons verhoudings wat ons as eenheid laat leef. Amen

      21 Maart

      Word stil met God

      Job 33:26 – As hy bid tot God, sal Hy hom aanvaar. God sal hom met vreugde ontvang, en hom ’n mens maak wat reg lewe. (NLV)

      Job worstel met God oor die inhoud van sy lewe. Hy verstaan nie hoekom sy lewenspad sulke afdraaie vat nie. Hy sukkel om sin te maak van die gevolge van sy keuses. Wat moet hy tog doen? Wat is God se oplossing?

      In sy storie is ’n belofte opgesluit vir ons almal. In en deur ons gebedslewe word ons uitgedaag om beter weergawes van onsself te word. As jy sou kies om voortdurend in kontak met God te wees deur jou gebedslewe kan jy nie aanhou om die mens te wees wat jy nog altyd was nie. Juis deur kontak met God, kan Hy my lewe en identiteit transformeer, en my in staat stel om reg te kies oor my lewe.

      Gebed neem natuurlik baie vorme aan. In stilte met God ontvang ons wysheid van Hom af. As ’n huwelikspaar kies om saam stil te word voor God, kan Hy natuurlik ook die huwelik verander. Groei van die individue en die verhouding kan plaasvind.

      Skep ’n ritueel waarin jy en jou maat stil word saam met God. Dit word dan ’n prioriteitsafspraak in jul lewe saam. Dit hoef nie lang tye elke dag te wees nie, maar probeer die frekwensie daarvan gereeld hou. Julle sal gou agterkom hoe afhanklik julle van hierdie tye saam met God raak. Nou kan die verhouding ontwikkel tot een wat deur die Gees van God geïnspireer word.

      Maak ek en my maat tyd om saam te bid en stil te raak?

      Liefdevolle Vader, hou ons in die liefde van ’n verhouding met U vas, sodat ons afhanklik van U bly. Amen

      22 Maart

      Laatnag-geselsies met God

      1 Kronieke 16:43 – Hierna is almal huis toe, en Dawid het teruggegaan om sy gesin te seën.

      Êrens in die warm nag droom ek in die hotelbed gedurende ’n wegnaweek.

      Ons gesin is op reis in ’n warm en groen land met hemelse kos. Gisteraand se lemmetjie-gemarineerde oesters, confit-eendjie, en basielkruidroomys vloei in en uit die bewussyn.

      Ons ry op fietse wat maklik trap. Die lug is helderblou; die seuns praat onophoudelik. Ons draai weg van die berg af en fiets op ’n breë sandpad. Die fietse rol teen die helling van die pad met die gekir van traplose lekker. Ek kyk om en Christoff het weggeraak. Ons drie soek hom noudat dit reeds donker is …

      Meteens skrik ek wakker en spring regop in die bed. Met die brillose astigmatisme visie van plus-50 sien ek net die twee koeëlronde groen ogies van die Espresso-masjien. En ek wonder beneweld, wie loer dan nou so uit die bosse vir ons?

      Middel-van-die-nag-lag oorval ons twee met die agieogies wat toegaan toe ek die muurprop uitpluk. Ek maak tee, want dis ons ritueel wanneer slaap ontwyk. Dan praat ons lang stories oor alles wat in die nag in jou kop rondspeel. Wanneer die ligte dan weer afgaan en dit stil word, weet ek my vrou lê en bid … vir my en ons seuns en ons lewe saam. Soveel seën vloei direk uit daardie tye van verbintenis met God.

      As man het ek gewis minder woorde as my vrou, ook met God. Gelukkig voel ek nie meer skuldig oor ek minder bid as sy nie. God ken my kommunikasiestyl. Ons twee gebruik net minder woorde.

      Maak ek genoeg tyd vir naby-oomblikke met God?

      Jesus, hoor my stem, maar hoor net soms die versugting van my hart. Amen

      23 Maart

      ’n СКАЧАТЬ