Suster Lilian se babasorgboek: Tradisionele en natuurlike sorg. Lilian Paramor
Чтение книги онлайн.
Читать онлайн книгу Suster Lilian se babasorgboek: Tradisionele en natuurlike sorg - Lilian Paramor страница 26
Название: Suster Lilian se babasorgboek: Tradisionele en natuurlike sorg
Автор: Lilian Paramor
Издательство: Ingram
Жанр: Секс и семейная психология
isbn: 9780798159043
isbn:
•Aanraking is van wesenlike belang, en selfs al steek daar min van jou baba se lyfie tussen die pype of pleisters uit, moet jy haar so dikwels moontlik streel. Na my mening kan dit ewe belangrik wees vir jou baba se oorlewing en groei as die “pype”. Steek jou hande deur die werkopeninge as jou baba in ’n toe broeikas is. Vra die personeel of jy hom kan vashou, selfs net vir ’n paar oomblikke op ’n keer, namate sy toestand verbeter. Dit sal vir julle baie beteken.
•Musiek kan net soveel stimulasie verskaf vir jou vroeggebore baba as vir enige ander baba. Speel strelende opnames en sing of neurie vir haar. Dit is natuurlik moeiliker om te doen as sy in ’n toe broeikas is, maar jy behoort iets te kan prakseer met behulp van die moderne tegnologie.
•Gesels ook dikwels met jou baba. Onthou, hy herken jou stem én sy pa s’n! Dit stimuleer jul kind om te weet dat julle naby hom is en omgee.
•Borsvoeding is een van die belangrikste geskenke wat jy vir jou vroeggebore baba kan gee. Begin so vroeg moontlik om borsmelk uit te pomp en probeer veral om jou kolostrum met ’n spuit of buisie vir jou baba in te gee. Dit is nie heeltemal die gewone praktyk nie, aangesien die hoeveelheid redelik klein is en sy daardie eerste paar dae dalk nog geen ander voeding as die aarvoeding kry nie. Gesels nietemin met jou pediater hieroor, aangesien kolostrum vloeibare goud is, propvol heilsaamheid wat jou baba ’n voorsprong sal help gee.
•Dit is belangrik om aan te hou om jou melk uit te pomp om te verseker dat jy aanhou melk produseer, selfs al het sy dit nie dadelik nodig nie. Jy kan jou melk tot 24 uur lank in die yskas bewaar of in gesteriliseerde bottels in die vrieskas bêre. As die situasie ’n aansienlike tyd gaan voortduur, sal jy waarskynlik vind dat ’n borspomp meer prakties is as om melk met die hand uit te pomp. Jy kan kies tussen ’n hand-, battery- of elektriese pomp; die mees geskikte keuse sal van persoon tot persoon verskil. Wees egter versigtig om nie jou tepels te beseer deur te gou ’n te sterk vakuum te gebruik nie.
ANDER UITDAGINGS
Wanneer jou baba eers die aanvanklike krisisse oorleef het, lê daar nog ’n hele paar struikelblokke voor. Babas doen dikwels infeksies op in die hospitaal, deels weens hul verlaagde weerstand, maar ook omdat ’n hospitaal byna per definisie ’n vrugbare teelaarde bied vir organismes. Was altyd jou hande baie deeglik voordat jy hom hanteer, en dit geld almal wat met hom in aanraking kom. As hy aan volgehoue hoë vlakke van suurstofterapie blootgestel was, is daar ’n moontlikheid dat die retina van die oë beskadig is – en julle sal mettertyd ’n oftalmoloog moet besoek. Dit gaan volgehoue toewyding verg om die suigrefleks te stimuleer en jou baba aan te moedig om genoeg melk in te neem; probeer dus sorg dat die res van jou program nie te veeleisend is nie.
Die dag gaan kom dat jou kind gereed sal wees om verskuif te word na ’n oop bedjie sonder enige spesiale hoëtegnologiesorg. Jy gaan van voor af al die gevoelens van onsekerheid rondom die versorging van ’n klein babatjie ervaar, maar dit gaan wonderlik wees om haar sonder enige belemmering te kan vashou en vertroetel. Kort daarna sal jy haar kan huis toe neem, maar julle gaan waarskynlik nog jare lank met die gevolge van die voortydige geboorte saamleef, veral as jou baba baie vroeg gebore is. Onthou dat jy nie hierdie kind met ander kinders van dieselfde ouderdom moet vergelyk nie, maar met kinders wat op die verwagte datum gebore is. Jou baba se verblyf in die spesiale sorg van die hospitaal was eintlik bloot ’n nabootsing van die tyd wat hy nog in die baarmoeder sou deurgebring het. Die meeste ouers aanvaar dit op ’n intellektuele vlak, maar vind dit steeds moeilik in die praktyk. Dit sal jou en jou kind baie spanning bespaar as jy dit kan onthou.
Die homeopatiese middel Baryta carb. kan ’n agterstand help inhaal en ook verdere probleme voorkom wat later arbeidsterapie mag vereis. Raadpleeg ’n homeopaat, aangesien dit op ’n baie spesifieke wyse voorgeskryf moet word.
Vyf
Ma ná die geboorte
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.