Voetspore 2. Johan Badenhorst

Чтение книги онлайн.

СКАЧАТЬ

      Braai die repies spek in ’n aparte pan.

      Sit die roosterbrood voor met die spek en esdoringstroop daaroor.

      Hoenderlewers op roosterbrood

      Dis vir mense wat daarvan hou dat hul mond brand. As jy nie een van hulle is nie, laat net die rissies weg.

      Voorbereidingstyd 10 minute • Gaarmaaktyd 20 minute

       Genoeg vir 6 mense

      1 ui, gekap

      olyfolie

      10 ml (2 t) fyngekapte knoffel

      10 ml (2 t) fyngekapte brandrissie

      500 g hoenderlewers, skoongemaak

      10 ml (2 t) bruinsuiker

      10 ml (2 t) suurlemoensap

      sout en peper na smaak

      roosterbrood

      Braai die ui in olyfolie tot byna deurskynend. Roer die knoffel en rissie by. Voeg die hoenderlewers, bruinsuiker en suurlemoensap by. Geur na smaak met sout en peper (alhoewel swartpeper oor die gaar produk soveel lekkerder is). Kook die lewers totdat dit lekker souserig is. Sit dit op roosterbrood voor.

      WENK: Die hoenderlewers kan ook voorgesit word saam met roereier of op gekookte aartappel in die skil.

      Geposjeerde eiers

      ’n Eiergereg vir ontbyt, of ’n ligte middagete.

      Voorbereidingstyd 20 minute • Gaarmaaktyd 20 minute

       Genoeg vir 6 mense

      25 g botter of margarien

      1 ui, fyngekap

      100 g hoenderlewers, skoongemaak en in stukkies gesny

      koekmeel

      300 ml tamatiesap

      300 ml droë witwyn

      2 ml (1/2 t) elk gedroogde roosmaryn,

       basiliekruid en tiemie

      10 swartolywe, ontpit en gekap

      sout en peper na smaak

      6 eiers

      6 snye roosterbrood

      hoenderlewerpatee

      Smelt die botter in ’n pan en braai die ui daarin tot sag en deurskynend. Voeg die hoenderlewers by en braai net totdat die kleur verander. Besprinkel liggies met koekmeel. Braai nog 5 minute. Giet die tamatiesap by, roer deeglik en voeg dan die wyn, kruie, olywe en sout en peper by. Sodra die mengsel begin borrel, breek die 6 eiers daarin oop en wag totdat dit gestol het. Smeer die roosterbrood met hoenderlewerpatee, skep ’n eier op elke sny en gooi die pansous bo-oor.

      Aartappelkoekies

      Dis altyd lekker saam met eiers en spek vir ontbyt en onses insiens waarskynlik die enigste noemenswaardige gereg in die Amerikaanse kookkuns.

      Voorbereidingstyd 10 minute • Gaarmaaktyd 20 minute

       Genoeg vir 6 mense

      3 aartappels, geskil en gerasper

      1 ui, geskil en gerasper, of sprietuie, gekap

      1 eier

      15 ml (1 e) parmesaankaas

      sout

      50 ml (1/5 k) kookolie

      Meng die gerasperde aartappels en uie. Klits die eier en meng dit saam met die kaas by die aartappelmengsel in. Geur met sout na smaak. Skep groot lepels vol daarvan in ’n pan met verhitte olie en vlakbraai die koekies aan albei kante tot ligbruin.

      Eiers in pão

      Hierdie een is vir die Mosambiekers.

      Voorbereidingstyd 10 minute • Gaarmaaktyd 20 minute

       Genoeg vir 6 mense

      6 Mosambiekse broodrolletjies (pão)

      250 ml (1 k) gekapte tamaties

      50 ml (1/5 k) gekapte sprietuie

      3 brandrissies, gekap

      25 ml (5 t) olie

      8 eiers

      100 ml (2/5 k) room

      sout en peper

      75 ml (5 e) botter

      250 ml (1 k) gerasperde kaas

      Sny die een kant van die broodrolletjies af en hol uit. Braai die tamaties, uie en brandrissies in olie tot sag; hou eenkant. Klits die eiers en room saam, geur met sout en peper na smaak, en maak soos roereier in ’n bottergesmeerde pan gaar. Skep eers die tamatiemengsel, daarna die roereier en dan die kaas in die uitgeholde broodrolletjies.

      Keniaanse vermicelli-brood

      Dis iets anders, maar probeer dit gerus.

      Voorbereidingstyd 10 minute • Gaarmaaktyd 20 minute

       Genoeg vir 6 mense

      500 g vermicelli

      1 liter (4 k) onversoete klappermelk

      125 g suiker

      5 ml (1 t) gemmer

      1 eier

      125 g koekmeel

      10 ml (2 t) botter

      Kook die vermicelli in water tot al dente. In ’n ander pot, verhit die klappermelk en suiker ongeveer 5 minute oor matige hitte. Voeg die gaar vermicelli en gemmer daarby. Klits die eier in ’n klein bakkie, voeg 10 ml (2 t) van die warm klappermelk daarby en roer dit dan by die res van die klappermelk in (dit voorkom dat die mengsel skif). Meng die meel nou by en gooi die deeg in ’n gietysterpot wat met botter gesmeer is. Sit die deksel op, plaas op ’n matige vuur, met kole op die deksel, en bak soos ’n potbrood ongeveer 1 uur lank.

      Terwyl die son ondergaan

      Voorgeregte klink na moeite, maar dis net die ding om ’n gewone ete om die kampvuur spesiaal te maak. Mens het juis tyd om te sit en kuier terwyl die vuur se kole nog nie reg vir braai is nie of die potjie nog staan en prut.

СКАЧАТЬ