Kokkedoor. Errieda du Toit

Чтение книги онлайн.

      Ek en my sussie, Sanet, moes vir skoolredes ses maande lank by Oupa en Ouma op Pennington in Kwazulu-Natal gaan bly. Ouma Hannie was ’n bobaasbakster. Ons moes douvoordag opstaan om of die beskuit te knie, die koeksisters te vleg en te doop in die stroop, piesangbrode of vetkoekies te bak. Of die melktertpappot skoon te eet.

      Sy was ’n uitsonderlike mens en het met voëls geboer, van makoue en hoenders tot poue. Die smake van haar ingelegde kerriebone met poupastei, boeregroente en geelrys het so góéd gepas.

      Elke Desember het die hele familie bymekaargekom, en veertig siele moes elke dag drie etes kry. Ouma het in Julie al begin voorberei aan die kospotte van Egipte, soos sy dit genoem het. Oupa moes drie weke lank sy motorhuis opoffer vir ’n lang tafel.

      Vandag nog is onthoukos vir my verlangkos, vol geure van familie, liefde en samesyn. Warm, veilig en geborge.

      Karen Meiring

      kykNET-kanaalhoof

      Mariëtta onthou:

      Geure, net soos musiek, bring herinneringe vir my terug. Die reuk van varsgesnyde komkommer is genoeg om my aan my hoërskooldae te laat terugdink. Die nare wiskundeklas was onmiddellik vergete as ek moeg en gaar van die skool af kom en die hele huis na varsgerasperde komkommer ruik.

      As ek ouma Kinnear se groenboontjiebredie kook, dink ek aan haar ou groen-en-wit Dover. Ruik ek kwepers, is ek terug in ouma Kruger se koel, donker spens met ingelegde vrugte wat dofweg in die skemerte blink. My pa ruik ek in die soet reuk van sekelboshout in die braaivleisplek.

      Mariëtta Kruger

      Kokkedoor-aanbieder, radio- en televisie-ikoon

      Gesoek en gevind

      Kokkedoor:

      ’n Groot kokkedoor (’n belangrike persoon). Kokkedoor is die verafrikaansing van die Franse coq d’or, die “haan van goud”. Goue hane was destyds baie gewild, maar skaars en duur. Net iemand wat baie ryk en gesien was kon dit bekostig. En as jy ’n goue haan kon bekostig, het dit van jou ’n groot kokkedoor gemaak. ’n Beroemde Franse fynproewersrestaurant is ook vernoem na die haan van goud.

      Kokkedoorkos:

      Vandag se kos, gegeur met gister. Dis ’n werkwoord, ’n versamelnaam, ’n troetelnaam en ’n manier van dink. Om te kokkedoor is om kosmaak te geniet, vriende en familie na die lang tafel te nooi en ure lank te gesels oor gister se dinge en môre se drome.

      Om te kokkedoor is om kosmaak te geniet en ure lank te gesels oor gister se dinge en môre se drome.

      ONTMOET

      Hetta van Deventer-Terblanche

      Kokkedoor-beoordelaar, sjef en kosgeskiedeniskenner

Meer oor Hetta:Hetta het op ’n Swellendamse skaap- en koringplaas grootgeword. As Silwood-student het sy by Topsi Venter op Roggeland gaan werk waar haar passie vir streekkos begin het. Sy doen graag navorsing oor kosgeskiedenis en is net so gelukkig in die argiewe – omring deur ou geskrifte en antieke kookboeke (met haar kenteken-syblom op die kraag) – as in haar blomtuin vol katjiepierings en pronkertjies.

Hetta beskou ons koskultuur as net so ryk soos fynbos, geseën met ongelooflike diepte en verskeidenheid.Hetta onthou: “Outydse soetkoekies laat my terugdink aan die groot inpak en die groot bak vir vakansies by die see. Ek sien nog die ou koekblikke met die rooi of blou strepe. Elkeen in die gesin het sy eie gunsteling- en sy swartskaapkoekie gehad. Hawermoutkoekies vir my pa, soetkoekies vir ons kinders en koffiekoekies vir die gaste. My broer kon ’n gemmerkoekie nie verdra nie.”

      “Tannie Myrtle, my peetma, glo tee moet uit ’n mooi koppie gedrink word. Dink ek aan outydse soetkoekies, dan dink ek aan fyn porseleinteekoppies, seevakansies en ’n lekker seergebrande lyf.”

      Outydse soetkoekies

      met Delft-porseleinversiering

      Lewer 24 koekies

      Koekies

      480 g (4 k) koekmeel

      2,5 ml (1/2 t) sout

      5 ml (1 t) fyn kaneel

      5 ml (1 t) fyn kruienaeltjies

      5 ml (1 t) fyn gemmer

      375 ml (11/2 k) suiker

      230 g botter

      60 ml (1/4 k) vet

      5 ml (1 t) koeksoda

      15 ml (1 e) louwarm water

      30 ml (2 e) muskadel of soetwyn

      1 eier, geklits

       Sif die meel, sout en speserye saam en voeg die suiker by. Vryf die botter en vet met die vingerpunte in die meelmengsel.

       Los die koeksoda in die louwarm water op en roer die muskadel of soetwyn by. Voeg die koeksodamengsel by die geklitste eier.

       Voeg die eiermengsel by die meelmengsel en meng tot ’n stywe deeg vorm. Knie om goed te meng. Laat rus die deeg oornag in die yskas.

       Voorverhit die oond tot 200 °C. Smeer bakplate goed.

       Rol die deeg tussen 2 lae plastiek tot ’n dikte van 3–5 mm uit. Sny die deeg in 8 cm-vierkante of druk vorms met ’n koekiedrukker uit. Plaas dit op die bakplate en bak 10–15 minute.

      Harde versiersel

      2 groot eierwitte (60 g)

      10 ml (2 t) vars suurlemoensap

      750 ml (3 k) versiersuiker, gesif

      voedselkleursel

СКАЧАТЬ