Duet. Johan Ferreira

Чтение книги онлайн.

СКАЧАТЬ woon min of meer op dieselfde plekkie hier op ons strand, of so vermoed ons. Hul nes is iewers weggesteek tussen die wit duine en die soom van die blou branders. Die ideale woonplek, ongerep en stil, weg van die lawaai van mense.

      Dié voëls kies een maat vir die res van hul lewe. En boonop is hulle ewe getrou aan hul woonplek as aan hul maat. Oestervangers woon tot 20 jaar lank op dieselfde plek. Die nes is sonder fieterjasies, slegs ’n paar skraapsels in die sand. Broeityd is gedurende die somer, wanneer die wyfie een tot vier eiers lê. Die taak om die eiers uit te broei word gedeel. Maar nie in eweredige porsies nie! Die wyfie bring meer tyd op die nes deur, terwyl haar wederhelf die omgewing dophou en sy vroutjie en voornemende kroos beskerm. Dié pragtige voëls is onder bedreiging ook hier aan die suidpunt van Afrika.

      Hoe mooi dat hulle ’n lewenslange maat kies! So groot is ons Skepper – dat selfs ’n voëltjie deur sy skeppingswerk getrou aan sy maat kan wees.

      Beloof weer jul trou aan mekaar. Vier jul huweliksband met ’n klein, intieme seremonie om julle so aan jul liefdesbeloftes te herinner.

      Here, dankie vir my lewensmaat. Help ons om ook soos die oestervangers vir altyd aan mekaar getrou te wees. Amen

      15 Februarie

      Kry jou gereedskap reg

      Romeine 8:28 – En ons weet dat God alles ten goede laat meewerk vir dié wat Hom liefhet, dié wat volgens sy besluit geroep is.

      Elke mens het ’n goddelike roeping. God is egter baie duidelik oor die prioriteite in ons lewe, en daar kan gewis in verskillende seisoene daarvan verskillende roepings wees.

      Die huwelik bly die belangrikste roeping vir getroudes. Naas ons verhouding met ons Skepper is ons grootste verantwoordelikheid om die beste lewensmaat te wees.

      Die meeste mense word nie voldoende voorberei vir die verantwoordelikhede van die huwelik nie. Ons gebruik die beperkte, soms gebroke, voorbeeld van ons ouers se verhouding as maatstaf vir geluk. Hierdie gebrek aan kennis en vaardighede lei tot gevoelens van onsekerheid en konflik binne die verhouding.

      Soos ek die Woord verstaan, maak God dit vir ons moontlik om ’n groot deel van ons skeppingsdoel binne die huwelik uit te leef deur die huwelik ’n verbondsverhouding te maak. Vanuit die eenheid van hierdie verhouding beloof God dat alles sal vloei. Dis vanuit die vervulling van hierdie doel dat God ons gesondheid, ons kinders, ons geldsake, ons hele lewe seën.

      Leef dus die verhouding wat God gebruik as voorbeeld van sy verhouding met ons, doeltreffend uit. Doen soveel moontlik kennis oor die aard van die verhouding op, lees, woon kursusse by en leef dan die kennis prakties uit. Kennis van die goddelike huwelik sal julle bemagtig om te weet wanneer julle reg optree en wanneer julle foute begaan. Sien dus jou verhouding as deel van jou roeping en bemagtig jouself met kennis.

      Het ek genoeg kennis oor God se prentjie van en doel met die huwelik?

      Almagtige God en Vader, help ons op die pad na beter vervulling van ons doelwit om geluk binne die huwelik te vind. Amen

      16 Februarie

      Word ’n beter jy

      Filippense 1:27 – Hoofsaak is dat julle leefstyl moet pas by die Goeie Nuus van Christus. (NLV)

      Ek dank die Here vir die mense in my lewe wat my voorbeeld was en is van hoe om ’n beter lewe te probeer leef. Vir sommige mense dien hul ouers se lewe as inspirasie; ander se soeke na rolmodelle en mentors is ewigdurend.

      As jong volwassenes leef die meeste mense roekeloos voort asof daar geen gevolge vir hul keuses is nie. Eers heelwat later in ons lewe sien ons die realistiese gevolge van ons besluite in en moet dit dan ook dra. Die meeste van ons het teen daardie tyd vergeet dat ons besluite van gister die lewe van vandag word.

      Die huwelik bring vir ons ’n speelveld van ’n verhoudingslewe waar verantwoordbaarheid tot ons voordeel kan uitspeel. Die blote feit dat iemand wat jou liefhet nou die konstante waarnemer van jou keuses word, bring ’n helderheid na vore wat die meeste mense anders na hul besluite laat kyk.

      Sommige sien hierdie konteks as beherend, ander as ’n plek van veiligheid. Hoe ouer ek word, hoe dankbaarder is ek vir die plek van veiligheid. Vroue weet en sien gewoon goed wat mans net miskyk. As jy as man die opmerkings van jou vrou kan sien as beveiliging van jul verhouding, eerder as beheer van jou lewe, is jy al ’n paar tree vorentoe om saam te groei na ’n meer volwasse verhouding.

      Mag ek ’n beter weergawe van myself word, ’n meer heel ek wat gebrokenheid tog aanvaar as deel van my menswees.

      Hoe kan ek ’n beter weergawe van myself word?

      My Vader, gee my die krag om die lang pad te loop na volwassenheid in U. Amen

      17 Februarie

      ’n Fontein van lewende water

      Psalm 23:2 – Hy laat my lê in groen weivelde; na waters waar rus is, lei Hy my. (NLV)

      Ons kom bymekaar in die kapelletjie wat uitkyk oor die veld, bome en ’n berg in die verte. Aan die voorkant van die groot venstermuur is ’n poel water wat die kerkie en die natuurskoon buite soomloos aan mekaar verbind.

      Die geleentheid, ’n lesersretreat vir diegene wat treur oor ’n verlies in hul lewe. Ons trek ons skoene uit by die ingang om in ootmoed tot God te nader. Daar is stoele vir diegene wat nie kans sien om op die vloer te sit of die gebedsbankies te gebruik nie.

      Ek maak my tuis op ’n kussing reg voor by die venster. Twee engelstemme sing vanuit die agterkant van die kapel. “Soos ’n hert smag na waterstrome, smag my siel na U, o Heer. U alleen is my hartsverlange en ek bring aan U die eer.”

      Ek voel ’n groot rustigheid my oorspoel. Toe ek my oë oopmaak, sien ek die bewegende kringetjies water in die poel voor my raak. ’n Teken van God se lewende water wat deur elkeen van ons vloei. Stadig en ritmies beweeg die water in kringbewegings tot by die hart van die fontein waar dit uiteindelik uitbundig borrel en bruis. Ek raak intens bewus van God se teenwoordigheid, van die geskenk van lewe, van hier wees. Met dié stap ’n ry tarentale ewe flink in gelid in die verte en ’n voël vlieg onverwags voor die venstermuur verby.

      Daar is altyd klein tekens van lewe, al voel dit dalk dood in en om jou. Laat God jul huwelik soos ’n borrelende fontein van lewende water vir mekaar en ander wees.

      Here, maak ons opnuut bewus van die stil krag van u lewende water wat deur ons huwelik vloei. Amen

      18 Februarie

      Praat mekaar se liefdestaal

      1 Korintiërs 13:1 – Al praat ek die tale van mense en engele, maar ek het geen liefde nie, het ek ’n stuk klinkende metaal, ’n galmende simbaal geword.

      My ernstige man is ’n man van min woorde as dit kom by uitbundige liefdesverklarings of die verspotte openbare vertoon van emosies. Hy verkies om eerder sy diepste gevoelens rustig op papier vas te pen en dan te deel. ’n Mooi kaartjie of briefie van hom af is iets wat ek bo alles koester. Met verjaardae en ander herdenkings kan ek altyd ’n paar woorde uit sy hart te wagte wees. Dikwels verras hy my met ’n nota in my tas of rekenaarsak as ek weggaan vir werk. Om te gee, ook met sy neergepende woorde, is sý liefdestaal.

      Toe СКАЧАТЬ