Uit die beek 2014. Attie van Wijk

Чтение книги онлайн.

СКАЧАТЬ nie. Dit is so menslik om ryk mense en arm mense verskillend te behandel.

      Die versoeningsoffer waarvan ons gelees het, was bedoel om die lopende uitgawes van die Tent van Ontmoeting te dek. Die diens was vir almal bedoel, en daarom moes almal gelyk bydra. Die rykes kon nie aanspraak maak op beter diens of ander voorregte nie. Voor die Here is alle mense gelyk. Dit moes baie duidelik wees by die plek van aanbidding.

      Hierdie beginsel het ons land al lankal vergeet, veral in die tyd toe apartheid nog die reël was. So baie swart en bruin mense is erg verneder en seergemaak deur die optrede van mense tydens eredienste en begrafnisse. Mag die Here ons daarvoor vergewe! Dalk is dit ook nodig om ver­skoning te vra by die mense wat deur ons liefdeloosheid seergemaak is.

      GEBED:

      Vergewe ons ons liefdeloosheid, God van liefde.

      Lees vanaand in Eksodus 30:22-38 hoe die wierook en mirre spesiaal vir die Here se diens afgesonder moes word.

      Vrydag 14 Februarie 2014 Lees eers Eksodus 31:1-18

      Vaardigheid

      […] Aan elke vakman het Ek vaardigheid gegee sodat hulle alles kan maak wat Ek jou beveel het […] – Eks 31:6

      GESELSVRAAG:

      In watter soort werk is vaardigheid nodig?

      “Wat maak julle hier?” vra ’n besoeker aan ’n groep mans wat klippe kap. “Ons kap elke dag net klippe,” sê die eerste een. “Ons swoeg hier in die hitte om vir ons gesinne te sorg,” antwoord die tweede. “Ons bou ’n katedraal vir die Here,” kondig die derde trots aan. Jy kan raai hoe die gehalte van werk waarskynlik verskil het. Vir die Here is net die beste goed genoeg.

      Die Here het Besaleël en Oholiab lank reeds vir hierdie groot werk voorberei. Hulle het jare lank as vakleerlinge gewerk en moes by die eenvoudigste en nederigste werk begin. Maar nou was hulle meesters in hul vak. Hulle het presies geweet hoe om die ingewikkelde boumateriaal vir die tabernakel voor te berei sodat elke stukkie presies op sy plek kon pas. Hulle was kunstenaars uit eie reg, wat weefwerk en kunsnaaldwerk van die hoogste gehalte kon lewer. Hulle kon met kosbare metale toor om die pragtigste voorwerpe te skep. Hulle kon trots wees op hul werk.

      Met elke ding wat ons vandag gaan doen, is vaardigheid nodig. Die manier waarop ons dit doen, en ons gesindheid gaan mense na Christus toe aantrek of afstoot. Onthou, dit is die Here wat jou toerus om jou werk goed en reg te doen. Moenie Hom teleurstel nie. Jou werk is ook jou getuienis.

      GEBED:

      Laat my werk vandag tot u eer wees, Here.

      Lees vanaand in Eksodus 32:1-10 hoe vinnig die volk die Tien Gebooie vergeet het en amper vir dié rede uitgewis is.

      Saterdag 15 Februarie 2014 Lees eers Eksodus 32:11-20

      Kragtige voorbidding

      Toe het die Here daarvan afgesien om die ramp waarvan Hy gepraat het, oor sy volk te bring. – Eks 32:14

      GESELSVRAAG:

      Wat is die geheim van kragtige gebed?

      “Ek is regtig moedeloos en depressief oor ons gemeente,” bely ’n kollega. “Ek was al baie dae lus om my hoedjie te vat en te loop.” Wanneer mense so moedeloos kan raak, dink net hoe moet die Here oor ons voel wanneer ons Hom so dikwels teleurstel. Hy het ’n wonderlike plan met sy kerk om die hele wêreld deur hulle te seën. Maar elke keer word hulle selfsugtig met hul liefde en gee hulle geensins om vir die miljoene mense wat nog verlore gaan nie.

      Moses het nou die wonderlike tyd saam met die Here deurgebring. Dit was vir hom soos ’n besoek aan die berg van verheerliking. En toe vertel die Here hom dat Hy die volk gaan uitdelg omdat hulle afgode gemaak en losbandig gelewe het. Moses het toe vir sy volk ingetree. Hy het die Here aan sy beloftes herinner en aan die verbond en aan wat die ongelowiges sou sê as die Here sy volk vernietig. Menslike argumente is swak, maar God se eer was op die spel; daarom het Hy Moses se gebed verhoor en die volk nie vernietig nie. Maar dit het nog nie gekeer dat Moses self woedend geword het toe hy sien wat aangaan nie (Eks 32:19).

      Die Here hou daarvan wanneer ons Hom aan sy beloftes herinner (Jes 62:6). Dit gee krag aan ons gebede. Oefen dus om Skrifgebede te bid en vertrou die Here om sy wil uit te werk.

      GEBED:

      Leer my om so te bid dat dit ’n verskil maak, Vader.

      Lees vanaand in Eksodus 32:21-35 oor Aäron se flou verskonings en hoe Moses die volk gestraf het.

      Sondag 16 Februarie 2014 Lees eers Psalm 128:1-6

      Die vrug van gehoorsaamheid

      Kyk, so word die man geseën wat die Here dien. – Ps 128:4

      GESELSVRAAG:

      Watter soort seën het ons van die Here nodig?

      “Ek sal my bekeer as ek eers oud geword het. Nou wil ek eers my lewe geniet,” is die onuitgesproke voorneme van baie jongmense. Hulle besef nie dat hierdie keuse die pad van die dood is nie. Sonder God het jy nie ’n toekoms nie. Ware vreugde lê nie in ’n losbandige lewe nie, maar in oorgawe en gehoorsaamheid.

      Hierdie pelgrimslied skilder ’n beter prentjie. Die geheim van ware voorspoed is om die Here te dien. Letterlik staan daar: om die Here te vrees. Dit loop uit op gehoorsaamheid. So iemand is gelukkig in sy werk (Ps 128:2) en in sy huisgesin (Ps 128:3). Die psalm sluit af met ’n pragtige gebed wat ons gerus vir mekaar kan aangee (Ps 128:4-6). Is dit nie wonderlik om in so ’n familie groot te word nie!

      So dikwels dink ons aan seën as iets wat net geestelik is. Of dalk het dit met ’n goeie oes of baie geld te doen. Maar dit het ook baie met ons gesondheid, gesindheid en gesin te doen. Dit is mos lekker om ’n kind van die Here te wees! Watter groter seën kan daar wees as dít?

      Daarom kan ons ook daarna uitsien om vandag saam met die ander kinders van die Here bymekaar te kom, ons Vader te loof en sy liefde, toerusting en opdragte te ontvang. Ons kan mekaar bemoedig en ondersteun in die stryd van elke dag. Ons hoef nie ons laste alleen te dra nie.

      GEBED:

      Dankie dat U ons so onverdiend seën, hemelse Vader.

      Lees vanaand in Psalm 129:1-8 waarom ’n gelowige kan moed hou in tye dat hy of sy dit nie maklik het nie.

      Maandag 17 Februarie 2014 Lees eers Eksodus 33:1-11

      Hoe hoor ek God se wil?

      […] Elkeen wat na die wil van die Here wou vra, het na die tent van ontmoeting buite die kamp gegaan. – Eks 33:7

      GESELSVRAAG:

      Hoe weet ons wat God se wil vir hierdie week is?

      “Wat sê God oor hierdie saak?” wou die een Arabiese leier na die ander van een van ons vriendinne weet. Sy het jare lank reeds in hul land gewoon en hulle het agtergekom God praat met haar. “Vra Hom self,” het sy dikwels aanbeveel, maar hulle het Hom nie geken nie. Maar hulle het haar vertrou, СКАЧАТЬ