Uit die beek 2014. Attie van Wijk

Чтение книги онлайн.

СКАЧАТЬ

      Hierdie pelgrimslied verwys waarskynlik na die tyd toe die Israeliete uit die ballingskap teruggekom het. Hulle moes kies tussen saai en eet. Dit was vir hulle groot blydskap dat hulle kon terugkeer na hul eie land. Maar toe het die wrede werklikheid hulle in die gesig gestaar. Die lande moes weer van voor af geploeg word. Daar was nie saad uit ’n vorige oes beskikbaar nie. Die saad wat hulle vir padkos ingepak het, moes nou gesaai word as hulle ’n oes wou hê. Dit was ’n moeilike keuse.

      Daar is egter ook ’n ander soort oes: siele. Dit is nie net die dominee wat daaroor besorg moet wees nie. Elke gelowige moet ’n hart hê vir mense wat verlore gaan. Dit is eers wanneer ons werklik begin huil oor hulle – nie net ons eie kinders en familie nie, maar ook die ander mense – dat ons iets daaraan sal begin doen om die goeie nuus met hulle te deel. God wil ons vandag daarvoor toerus.

      GEBED:

      Hemelse Vader, gee my u hart vir verlore mense, sodat ek sal opoffer om ’n groot oes te verseker.

      Lees vanaand in Psalm 127:1-5 waarom God ’n plek in elkeen van ons planne en ondernemings moet hê.

      Maandag 10 Februarie 2014 Lees eers Eksodus 28:31-43

      Aan die Here gewy

      Jy moet ’n blom van suiwer goud maak en daarop, soos op ’n seëlring, graveer: Aan Die Here Gewy. – Eks 28:36

      GESELSVRAAG:

      Wat kan ons hierdie week aan die Here wy?

      Soli Deo Gloria (Net tot God se eer) staan op een van ons muntstukke gegraveer. Het jy dit al opgelet? Watter een is dit? Ja, dit is die R1-stuk. Al dink ’n mens soms dat geld die bron van alle euwels is, het iemand die wysheid gehad om elke rand aan die Here te wy. Net soos Jesus vir die Jode gesê het dat die keiser sy deel moet kry omdat sy gesig en naam op die muntstuk verskyn, so moet God ook sy deel van ons begroting kry omdat sy Naam op ons geldstukke staan. Stem jy saam?

      In vandag se gedeelte het ons verder gelees hoe die hoëpriester se klere moes lyk. Die 1983-vertaling praat van ’n goue blom. Die ander vertalings praat deurgaans van ’n goue plaat, met een uitsondering wat van ’n roset praat. Maar die belangrike ding is dat die woorde “Aan die Here gewy” oftewel “Heilig aan die Here” daarop gegraveer is. Hierdie versiersel was vir die tulband van die hoëpriester bedoel. In vers 38 word verduidelik dat hy die volk verteenwoordig het. Die volk moes aan die Here gewy wees. Dit was die teken dat die Here teenoor hulle goedgesind is.

      Kom ons wy onsself met alles wat ons het hierdie week aan die Here. Ons behoort volledig aan Hom, want Christus het ons deur sy eie bloed vrygekoop, sodat ons Hom voluit kan dien.

      GEBED:

      Ek wy myself, my gesin en besittings aan U, Here.

      Lees vanaand in Eksodus 29:1-14 hoe die priesters hul aan die Here gewy het.

      Dinsdag 11 Februarie 2014 Lees eers Eksodus 29:15-28

      Geheilig vir die Here

      […] Dan sal hy en sy klere, en sy seuns en hulle klere gewy wees. – Eks 29:21

      GESELSVRAAG:

      Wat verstaan jy onder die woord “heilig”?

      “Heilige Dawid” was die bynaam van wyle prof. Dawid de Villiers. Hoe sou jy daarvan hou as mense jou die bynaam “Heilige (jou naam)” sou gee? Sou dit gepas wees, of sou hulle dit tong-in-die-kies gebruik? As ons vandag sê iemand “hou hom heilig” dan bedoel ons waarskynlik dat hy ’n huigelaar is. Hy is nie eg nie. Hoe anders as wat die Here dit bedoel het.

      Ons het vandag gelees hoe Aäron en sy seuns vir hul amp afgesonder is. Die hele seremonie moes wys dat hierdie mense volledig in die Here se diens staan. Die bloed was die teken dat hulle sondes deur die offers weggeneem is, sodat daar niks tussen hulle en God sou wees nie. Nou kon hulle met vrymoedigheid vir die volk gaan intree.

      Maar wat bedoel die Here wanneer Hy sê: “Wees heilig, want Ek is heilig” (1 Pet 1:16)? Beteken dit sondeloos? In God se geval is dit waar, maar dit is net in Christus dat ons ooit dit kan waag om te sê dat ons sondeloos is. “Soos Hy wat julle geroep het, heilig is, moet julle ook in julle hele lewenswandel heilig wees,” vermaan Petrus ons (1 Pet 1:15). Ons moet volledig aan die Here gewy wees. Ons staan vandag in sy diens, net so volledig soos wat Aäron in daardie tyd aan die Here gewy was.

      GEBED:

      Here, leer my hoe om waarlik aan U toegewy te wees.

      Lees vanaand in Eksodus 29:29-37 hoe voorsiening gemaak is vir die opvolgers van die eerste hoëpriester en priesters.

      Woensdag 12 Februarie 2014 Lees eers Eksodus 29:38-46

      Lewensveranderende ontmoeting

      Dáár sal Ek die Israeliete ontmoet en daar sal hulle geheilig word deur my magtige teenwoordigheid. – Eks 29:43

      GESELSVRAAG:

      Watter ontmoetings het ons lewe verander?

      “Here, ek sal Sondag kerk toe gaan, maar moet tog niks van my vra nie en moet niks in my lewe verander nie.” Daar is seker min van ons wat so bid voordat ons kerk toe gaan. Tog is daar min van ons wat kerk toe gaan met die verwagting dat die Here ons gaan omkeer. Ons hou mos van die status quo. Ek is goed genoeg, dankie.

      In vandag se Skriflesing het die Here Moses vertel hoe Hy die volk wou ontmoet. Daar by die ingang van die tent van ontmoeting sou God met Moses praat (Eks 29:42). Maar meer nog, as enigeen van die Israeliete ook daar opdaag en ’n ontmoeting met die lewende God verlang, sou dit gebeur. Hulle sou geheilig word deur daardie ontmoeting. Hulle sou aan Hom gewy wees. Hulle sou in sy diens staan en aan Hom gehoorsaam wou wees. Hulle sou besef dat Hy hulle God is en dat Hy tussen hulle woon.

      Waar is God vandag? As jy antwoord “in die hemel” is jy seker reg, maar dit is nie al nie. Hy is mos alomteenwoordig. Hy is ook nou daar by jou waar jy in hierdie boek sit en lees. En as jy alles van jouself aan Hom oorgegee het, is Hy ook in jou. Jesus sê die Drie-enige God kom woon in ons (Joh 14:17, 20). Hy wil vandag met jou werk toe en skool toe gaan. Hy wil jou verander en deur jou ander mense se lewens verander.

      GEBED:

      Wees U die Koning van my hele lewe, Here Jesus.

      Lees vanaand in Eksodus 30:1-10 oor die rol van die altaar – wat ná Christus se kruisdood nie meer nodig was nie.

      Donderdag 13 Februarie 2014 Lees eers Eksodus 30:11-21

      Almal gelyk

      Die ryke moet nie meer en die arme nie minder as die offergawe van ses gram silwer vir My bring as versoeningsoffer vir sy lewe nie. – Eks 30:15

      GESELSVRAAG:

      Hoe verskil ons optrede teenoor rykes en armes?

      “Toe ek nog klein was, het dit ’n slag sleg met ons geldsake gegaan, en die ACVV-tannies het vir ons kos voorsien. Hulle het dit só gedoen dat ons daardeur verneder is,” verduidelik ’n medestudent waarom hy niks met liefdadigheid СКАЧАТЬ