'n Lewe voor God. Stephan Joubert
Чтение книги онлайн.
Читать онлайн книгу 'n Lewe voor God - Stephan Joubert страница 17
Название: 'n Lewe voor God
Автор: Stephan Joubert
Издательство: Ingram
Жанр: Религия: прочее
isbn: 9780796321343
isbn:
Moenie van vroeg tot laat rondskarrel nie. Kom tot rus. Vind vrede aan die voete van die Heer. Buig in stilte voor Hom neer.
Here, laat my rus vind vir my siel aan u voete.
25 MAART Lees Spreuke 26:1-6
Gee die regte antwoord
Moenie ’n dwaas se vraag op net so ’n dwase manier beantwoord nie (4).
Weerspreek die skrywer van Spreuke homself hier in vers 4 en 5? In vers 4 hoor ons dat ’n mens nie ’n dwaas na sy domheid moet antwoord nie, maar in vers 5 lees ons dat jy juis ’n dwaas op sy eie dom manier moet antwoord. Hoe op dees aarde werk dit?
Die skrywer het baie goed geweet wat hy doen toe hy hierdie twee verse rug teen rug geplaas het. Hy wou die punt helder en duidelik maak dat wyses weet hoe om verskillende situasies te lees. Hulle weet wanneer om te praat en wanneer nie. Nog meer, hulle weet wat om vir wie te sê.
Hoe weet ’n mens wanneer om te praat en wanneer nie? Wel, dit is hier waar wysheid inkom. Van jou kant af moet jy jou tong elke dag aan die Here gee en Hom vra om jou te leer om dit reg te gebruik. Los dan die res oor aan Hom. Vertrou die Here met elke woord van jou. Wanneer jy in ’n situasie beland waar jy nie weet wat om te sê nie, bid ’n vinnige skietgebedjie om hemelse wysheid. Hierna sê jy jou sê! Of jy hou jou mond!
Smeek die Here om wysheid. Vra dat Hy jou tong sal afrig. Pleit by Hom dat Hy jou altyd die regte woorde op die regte tyd sal gee.
Grote God, ek smeek U: neem my tong in u diens.
26 MAART Lees Spreuke 27:1
Leef eers vandag voordat jy na môre kyk
Moenie roem oor wat jy môre verwag nie; jy weet nie wat die dag sal oplewer nie (1).
God gee lewe in “een dag op ’n slag”-porsies weg. Nooit waarborg Hy vyf jaar of tien jaar se lewe vooruit nie. Nee, Hy gee net vandag se stukkie sonskyn, reën en lewe. Môre s’n moet wag totdat môre aangebreek het. Vergeet dus ’n slag van môre. Daaroor besluit God!
As jou lewe vandag nie lekker of opwindend is nie, kan jy iets doen om dit op te vrolik. Moenie wag dat ander mense dit vir jou doen nie. Moet ook nie dink die lewe skuld jou iets nie. Dan gaan jy jou lewe lank met ’n lang gesig rondloop. Nee, waag dit om vandag ’n feesdag te maak. Vier nou ’n stukkie vreugde oor ’n koppie koffie saam met vriende en familie. Maak vandag tyd vir jou kinders en jou huweliksmaat. Laat staan ’n paar van jou afsprake; kanselleer ’n paar vervelige vergaderings.
Begin leef, want jy het net vandag tot jou beskikking om dit te doen. Slegs as God wil, sal jy môre die son sien. Maar dit is nog ’n hele dagreis verder se toekomsmusiek. Leef nou voluit. Maak vandag die moeite werd en vertrou die Here met die dag van môre. Net Hy hou die sleutels van die toekoms vas. Net Hy kan sê of jy môre die son gaan sien opkom, of nie.
Here, dankie dat ek vandag voluit mag leef.
27 MAART Lees Spreuke 27:17
Vriendskap kan goeie raad en vermanings aanvaar
Yster slyp yster; vriende vorm mekaar (17).
’n Stuk onbewerkte metaal word deur ’n ystersmid baie warm gemaak en dan met ’n hamer gevorm soos hy dit wil hê. Dieselfde gebeur wanneer ’n mens ’n swaard wil skerp maak. Daarvoor het jy ’n ander stuk klipharde metaal nodig. Yster is nodig om yster te vorm en te slyp. Dit was nog altyd so.
Goeie vriende is soos twee stukke yster. Vir die een stuk yster om ’n sekere vorm aan te neem, moet die ander stuk yster hard en aanhoudend daaraan skaaf en skuur. Dit is ’n moeisame proses wat met sweet en pyn gepaardgaan, maar die resultaat is die moeite werd. So gaan dit met goeie vriende. Omdat hulle mekaar vertrou, is hulle bereid om mekaar te skaaf en te vorm tot God se eer!
’n Goeie vriendskap is gebou op lojaliteit en eerlikheid. Goeie vriende sê vir mekaar as daar foute in hulle lewe is wat reggestel moet word. Hulle praat nooit agteraf oor mekaar nie. Nee, goeie vriende praat padlangs, opbouend, eerlik, deernisvol, ontfermend, reguit en mooi met mekaar. Hulle deel hulle diepste hartsgeheime met mekaar, want hulle vertrou mekaar. Hulle beskerm mekaar se integriteit. Die belangrikste van alles: Hulle bid gedurig vir mekaar. Is jy ook so ’n vriend?
Here, maak my ’n goeie vriend vir my vriende.
28 MAART Lees Spreuke 28:1-8
Wyse mense weet wat reg is en wat nie
Slegte mense het geen begrip van wat reg is nie … (5).
Die Here se soort wysheid stel mense in staat om te weet wat reg is en wat nie. God skryf sy wet oor in die harte van almal wat dag na dag in sy skool van wysheid deurbring. Daarom het hulle ’n goeie begrip van wat reg en verkeerd is. Omdat hulle deurentyd sensitief is vir die leiding van God se Gees herken hulle sy stem as Hy met hulle praat. Dan loop hulle ook op die koers wat Hy vir hulle aandui.
Mense wat nie in pas met God stap nie, het dikwels die grootste monde wanneer dit by reg en verkeerd kom. Maar wanneer dit by God kom, verwerdig hulle hulle nie eens om voor Hom te buig nie. Ook geen wonder nie, want dwase het geen idee van reg of verkeerd nie. Hulle vra immers nie na God se wil nie.
Leef vandag wys. Vra na God se wil vir jou lewe. Luister totdat jy die hemelse koersaanduidings hoor. Kyk totdat jy mooi sien waar jy jou voete moet neersit. Doen dit dan. Vertrou die Here om jou te leer wat reg is en wat nie. Laat Hy jou onderrig oor die pad van die lewe waarop jy vandag moet stap. Vermy tog maar die advies van dwase. Hulle het geen idee wat God wil hê nie. Hulle leef in ’n doodloopstraat. Wees jy liewer die een wat hulle met lewende raad bedien.
Here, maak my sensitief vir die waarheid.
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.