Bruistablette vir die lewe. Susan Coetzer
Чтение книги онлайн.
Читать онлайн книгу Bruistablette vir die lewe - Susan Coetzer страница 22
Название: Bruistablette vir die lewe
Автор: Susan Coetzer
Издательство: Ingram
Жанр: Религия: прочее
isbn: 9780796320506
isbn:
’n Ma se hart is XXXXXL – baie groter as ’n Great Dane se hart. Groter as ’n kerkgebou. Groter as ’n sirkustent. Groter as Kilimanjaro of Mount Everest.
Jy kan ’n ma se hart nie in kilogramme of kilometers meet nie. Haar liefde het geen einde nie en ken geen perke nie. Sy is ’n voorbidder en ’n slaansak vir haar kinders deur al die stadiums van hulle lewe heen – van die nat, stink doeke tot by testosteroon en ander hormone wat handuit ruk.
Die woordeboek sê ’n mens spel ma só: m-a. Die regte spelling, dink ek, is egter: l-i-e-f-d-e. Onvoorwaardelike agape-liefde, omgeeliefde.
Bring eer aan jou ma terwyl sy nog leef. Koester jou herinneringe aan haar as sy nie meer leef nie. Haar liefde vir jou is waarskynlik die grootse voorbeeld van hoe Jesus se ewige en onvoorwaardelike omgeeliefde vir jou lyk.
Bruisgebed vir ma’s: Here Jesus, dankie vir die voorreg om ’n ma te kan wees. Laat my liefde vir elke kind en kleinkind ’n navolgenswaardige voorbeeld wees van hoe u onvoorwaardelike omgeeliefde vir ons lyk. Tot eer van u Naam.
Vitamien K
Klei
U is tog ons Vader, Here. Ons is die klei waaraan U ’n vorm gegee het. U hande het ons almal gemaak.
– Jesaja 64:8
As kind was dit vir my heerlik om met bolle klei te speel. Ek kon my ure lank daarmee vermaak. Dit was wonderlik om te sien wat ek alles uit ’n stuk klei kon skep as ek dit sag in my hande brei. Mannetjies, blomme, diertjies. Dit wil sê, as die klei saamgespeel het.
As die klei hard was, het ek gesukkel om enige nuwe vorm daaraan te gee. Dit het verkrummel en gebreek onder my vingers. Ek kon niks moois maak nie.
Sien jouself as ’n stuk klei in die Skepper se hande. Ervaar hoe Hy jou innerlike en jou karakter in sy hande brei en aan jou ’n mooi, nuwe vorm gee. Een wat al meer soos Hy lyk.
Dikwels groei ons nie tot geestelike volwassenheid nie en ons kry nie dieper insig in God nie omdat ons so koppig is en teen die prikkels bly skop. Ons ekkerigheid en alwetendheid veroorsaak dat ons as klei nie kan verander nie. Ons kan nie die goddelike vorm aanneem wat die Here vir ons beplan nie. Ons bly ’n harde en opstandige bol klei in sy hande.
Watter soort klei is jy in die hande van die Pottebakker? Is jy oorgegee en sag en plooibaar in sy Vaderhand? Is jy nederig en bereid dat Hy jou harde hart verander? Is jy teachable? Is jy bereid dat Hy jou vernuwe en vir jou nuwe oë en ore gee? Raak bewus daarvan dat jy die klei en Hy die pottebakker is. Nie andersom nie.
Bruisgebed vir klei-wees: Vader, ek gee my oor in u hande, die hande van die Pottebakker. Vorm my en maak my, verander my om al meer soos U te lyk. Tot eer van u Naam.
Vitamien N
Naby
Die Here is by my, ek sal nie bang wees nie. Wat kan ’n mens aan my doen?
– Psalm 118:6
Is jy bang, veral vir mense? Is jy bang vir wat hulle aan jou kan doen? Is jy bang vir boosaards met wapens? Vir invloedryke mense in gesagsposisies? Mense van wie jy afhanklik is en wat vir jou ’n deur oop of toe kan maak? Is jy bang om standpunt in te neem vir wat reg is? Bang dat mense jou sal dreig, verwerp of dat jy selfs jou werk sal verloor?
In ons land met soveel spanning en misdaad vrees baie mense elke dag vir hulle lewe. Hierdie vrees en angs dreineer ons energie. Dit perk ons in sodat ons nie met blydskap en dankbaarheid kan leef nie. Dit is soos om met jou motor met die handrem op te ry. Dit keer dat jy optimaal kan funksioneer.
Kom ons kyk vandag hoe Dawid sy vrees oorwin het. Hy het in God se oë opgekyk, nie in die oë van sy vyande wat sy vrees sou aanhits nie. Hy het ook in God se oë gekyk vir verheffing en oorwinning, nie in mense se oë nie.
Dawid was ’n man na God se hart. Nie omdat hy perfek was nie (hy het baie foute gemaak), maar omdat hy God se teenwoordigheid met sy hele hart gesoek het. Dawid se oortuiging dat God naby aan hom was, het hom in staat gestel om prontuit in die aangesig van sy vyande te sê: Die Here is naby my, ek ken geen vrees nie; wat kan ’n mens aan my doen?
Is jy, soos Dawid, diep bewus daarvan dat God naby aan jou is, in elke situasie en elke uitdaging? Dan is daar geen rede vir vrees nie.
Bruisgebed vir vreesbevange mense: Vader, ek bid dat U hierdie woorde in my hart sal vassement: Die almagtige Here is elke oomblik naby aan my. Wat kan ’n mens aan my doen?
Конец ознакомительного фрагмента.
Текст предоставлен ООО «ЛитРес».
Прочитайте эту книгу целиком, купив полную легальную версию на ЛитРес.
Безопасно оплатить книгу можно банковской картой Visa, MasterCard, Maestro, со счета мобильного телефона, с платежного терминала, в салоне МТС или Связной, через PayPal, WebMoney, Яндекс.Деньги, QIWI Кошелек, бонусными картами или другим удобным Вам способом.