Wanneer God jou vashou. Johan Smit

Чтение книги онлайн.

СКАЧАТЬ

      Die volk van die Here het selfs ten spyte van die vernederende ballingskap nog steeds in hulle sonde volhard. Esegiël tree as profeet op tydens die ballingskap en hy rig sy boodskap aan die volk in ballingskap sowel as diegene wat in Israel en Juda agtergebly het. Netsoos Jeremia pleit hy by die volk om hulle van harte tot die Here te bekeer. Die verrassende is dat God ongeduldig daarop wag om sy volk te begenadig. Al wat Hy vra is dat sy volk net weer na Hom sal draai, na Hom sal luister en Hom sal gehoorsaam.

      In hoofstuk 34 is die Here Self aan die woord. En Hy praat as die herder van sy volk. God wil so graag vir sy mense die herder van Psalm 23 wees. Luis­ter hoe steek Hy sy hande met deernis na sy kudde uit: Hy wil dié wat wegge­raak het en verdwaal het weer terugbring na die kudde; Hy wil diegene wat seer­gekry het se wonde versorg en die swakkes help. God is daar vir sy kudde. Maar die kudde van die Here bestaan nie uit willose diere nie; sy kudde be­staan uit mense wat kan kies. God sal ’n herder wees vir hulle wat Hom as hulle Herder kies.

      Die teksvers dra ook ’n oordeelsboodskap. Daar is skape wat vet en sterk geword het omdat hulle hulself ten koste van ander verryk het. Sulke skape hoort nie in die Herder se kraal nie. God is ’n Herder wat reg laat geskied.

      Afgedwaal? Verdwaal? Moeg en moedeloos? Herderloos? Die Herder wag vir jou met genesende hande!

      21 Februarie

      Moedswillige skape

      Red u volk en seën dié wat aan U behoort; wees vir hulle ’n herder en sorg altyd vir hulle. Psalm 28:9

      Luister tog, Herder van Israel, U wat die nageslag van Josef soos ’n kudde lei; U wat oor die gerubs troon, verskyn tog aan ons! Psalm 80:2

      ~

      Psalm 23 kan goedskiks as ’n geloofsbelydenis gesien word. Só is my God en dít is wat ek van Hom glo. Die vraag is nou hoe die belydenis in die hitte van die lewenstryd geloofwaardig gaan bly. Sal God Homself regtig só in die lewens van sy kinders openbaar?

      In Psalm 28 praat die digter vanuit die hitte van die stryd. Hy bid dat die Here, sy Herder, tog asseblief vir sy volk ’n herder moet wees en hulle moet red. Hy begin sy gebed met hierdie veelseggende woorde: “Ek roep na U, Here, my Rots, moet tog nie doof wees vir my nie. As U bly swyg, sal ek wees soos ’n sterwende” (v 1). Hierdie man (en sy volk) het die vallei van donkerte betree. Wat gaan God nou doen? Dat die Here wel tot sy volk se redding gekom het, is gewis: “Aan die Here kom die lof toe, want Hy het my smeekstem gehoor. … Hy het my gehelp. Daarom is ek bly en wil ek Hom loof met my lied” (v 6–7b).

      In Psalm 80 doen die digter weer ’n keer ’n beroep op sy Herder om aan sy volk te verskyn. Dinge het intussen sleg skeefgeloop vir Israel. Psalm 80 vertel die hartseerstorie van ’n volk wat van die Herder weggedwaal het. En die digter vra nou dat die Herder net nie sy rug op sy kudde sal draai nie. Die psalm sluit af met ’n belofte van trou. “Hou ons aan die lewe, dan sal ons u Naam aanroep!” (v 19).

      Die hemelse Herder het so baie moedswillige skape in sy kraal.

      22 Februarie

      Die nuwe Herder

      Ek gaan vir hulle net een herder aanstel, en hy sal vir hulle sorg: my dienaar Dawid. Hy sal vir hulle sorg, hy sal vir hulle ’n herder wees. Esegiël 34:23

      En jy, Betlehem, gebied van Juda, jy is beslis nie die kleinste onder die leiers van Juda nie. Uit jou sal ’n leier voortkom wat vir my volk Israel ’n herder sal wees. Matteus 2:6

      ~

      Die profeet Esegiël het ook ander herders in sy visier, naamlik die pries­ters en profete wat God se volk moes versorg en op die regte pad moes begelei. Hierdie herders het egter hulle plig versaak en deur hulle ontrou veroorsaak dat God se kudde uitmekaar gejaag is. Oor die ontroue herders het God sy oordeel uitgespreek.

      Die Opperherder gaan egter nie sy kudde in die steek laat nie. As die her­ders wat namens Hom oor sy kudde moes waghou en versorg, nie aan verwagtings kon voldoen nie, sal Hy vir hulle ’n ander herder gee. Hy noem die herder “my dienaar Dawid”. Dawid was die koning na God se hart, die ko­ning wat werklik vir sy volk ’n goeie herder was. “Ek, die Here, sal hulle God wees, en my dienaar Dawid sal oor hulle regeer” (Eseg 34:24a). Natuurlik laat hierdie belofte vir ons onmiddellik vorentoe kyk, na die Seun van Dawid, die loot uit die stomp van Isai wat sou kom om as Messiaskoning te regeer.

      En dan, een wintersnag, word daar ’n kind in ’n stal in Betlehem gebore. Hy is die Herderkoning! In Matteus 2:6 word sy geboorte as die vervulling van die profesie van Miga 5:1 gesien. Die enigste verskil tussen die twee teksverse is dat Matteus Hom ’n herder noem! En die verrassende is dat dit juis ’n aantal her­ders is wat heel eerste van alle mense die aankondiging van sy geboorte ontvang.

      Ten spyte van ontroue herders laat die Opperherder nie sy kudde in die steek nie.

      23 Februarie

      Die Goeie Herder

      Ek is die goeie herder. Die goeie herder lê sy lewe af vir die skape. Johannes 10:11

      ~

      Die Herder is in Betlehem gebore. Hy is God se antwoord op ’n wêreld waarin die skape verward ronddwaal. Volg net hierdie Herder en julle sal vrede en rus hê. Volg Hom en Hy sal vir julle by groen weivelde en waters van vrede bring. ’n Mens sou verwag dat ’n volk wat in duisternis geleef het, die koms van die Herder met groot toejuiging sou begroet. Maar nee, dit was toe anders. Benewens ’n engelekoor wat ook maar net deur ’n klompie herders gesien en gehoor is, was daar geen fanfare nie. Jare later, toe Jesus sy bediening begin, het Hy Homself wel as die Goeie Herder aangemeld, maar mense was nie al te opgewonde oor Hom nie. Hy het nogal hoë eise gestel aan sy volgelinge: “As iemand agter My aan wil kom, moet hy homself verloën, sy kruis opneem en My volg” (Matt 16:24). Hy het mense opgeroep om teen die grein van hulle sondige natuur in ’n tweede myl te loop, ’n ander wang te draai en hulle vyande te seën. En tog was Hy ook die Herder wat genooi het: “Kom na My toe, almal wat uitgeput en oorlaai is, en Ek sal julle rus gee” (Matt 11:28) – dis mos herdertaal!

      In Johannes 10 vertel Jesus vir ons wat dit beteken dat Hy die goeie herder is. In hierdie Skrifgedeelte word dit ook duidelik hoe God deur sy Seun Psalm 23 in die lewens van sy kinders wil realiseer. Ons moet net nougeset luister na die woorde van die Herder, en getrou op sy spore volg.

      Die Herder sê nou vir jou: “Kom na My toe as jy uitgeput en oorlaai is. Ek sal vir jou rus gee.”

      24 Februarie

      Die hek en die Hek

      Dít verseker Ek julle: Wie nie deur die hek in die skaapkraal ingaan nie maar van ’n ander kant af inklim, is ’n dief en ’n rower. Maar hy wat deur die hek ingaan, is die skape se herder; vir hom maak die hekwagter oop … Johannes 10:1–3

      Ek is die ingang; as iemand deur My ingaan, sal hy gered word … Johannes 10:9a

      ~

      In hierdie “gelykenis” gebruik Jesus twee beelde wat op Homself betrekking het: Hy is die goeie herder wat na sy skape omsien, maar Hy is ook die hek waardeur die skape toegang kry tot die skaapkraal.

      Die СКАЧАТЬ