Oorkom jou vrees. Benescke Janse van Rensburg

Чтение книги онлайн.

СКАЧАТЬ en erken dat Ek God is, hoog bo die nasies, hoog bo die aarde. Die Here, die Almagtige, is by ons, die God van Jakob is vir ons ’n beskutting.

      Na aanleiding van ’n dagstukkie (hoofstuk 18) waarin ek geskryf het dat God se gedagtes nie ons gedagtes is nie en dat Hy altyd die groter prentjie sien wanneer ons net ’n gedeelte sien, deel ek graag hierdie e-pos wat Johan Oosthuizen uit Kasakstan gestuur het.

      Hy skryf: “My stiefpa, vir wie ek baie lief was, het ’n tyd gelede ernstig siek geword en is in die hospitaal opgeneem. In dieselfde tyd het ’n buitelandse prediker spesiale dienste by ons kerk gelei. Een aand na afloop van die kerkdiens het die prediker ’n uitnodiging gerig aan alle siekes in die gehoor (of diegene wat namens ’n siek geliefde wou instaan) om na vore te gaan sodat hy vir ons kon bid. Ek het dadelik namens my stiefpa vorentoe gegaan.

      “Die prediker het vir almal voor my in die ry gebid. Toe hy by my kom, het hy egter nie vir my gebid nie, maar na die persoon langs my beweeg. Ek is teleurgesteld huis toe. Toe ek by die huis kom, het ek ’n oproep van my ma gekry met die hartseer nuus dat my stiefpa aan ’n hartaanval gesterf het.

      “Ek is die volgende aand terug kerk toe. Na afloop van die diens het ek die prediker gevra hoekom hy nie die vorige aand vir my gebid het nie. Hy het geantwoord dat God aan hom gewys het dat my stiefpa ernstig siek was. As hy vir hom sou bid, sou my stiefpa leef, maar dan sou hy later ’n veel erger dood sterf. In die nadoodse ondersoek het ons uitgevind dat my stiefpa kanker gehad het. Dit is nie tydens sy lewe gediagnoseer nie. God het hom dus daarvan gespaar.

      “Ek het opnuut besef dat God almagtig is. Wanneer Hy soms nie ons gebede beantwoord nie, is Hy heel moontlik eintlik besig om ons te beskerm!”

      Johan is reg. God sien die hele legkaart waar ons net ’n deel daarvan sien, en daarom vrae vra en wonder of God van ons vergeet het. In 1 Korintiërs 13:12 lees ons: “Nou kyk ons nog in ’n dowwe spieël en sien ’n raaiselagtige beeld, maar eendag sal ons alles sien soos dit werklik is. Nou ken ek net gedeeltelik, maar eendag sal ek ten volle ken soos God my ten volle ken.”

      Koning Hiskia se lewe is ’n voorbeeld hiervan. Hy was ’n gelowige en godvresende man wat in die bloeityd van Juda geregeer het. Hy het egter ernstig siek geword. Op sy sterfbed het hy God gesmeek dat God nie sy lewe sal beëindig nie. God verhoor toe sy gebed en verleng sy lewe met vyftien jaar (2 Konings 18).

      In hierdie ekstra vyftien jaar het Hiskia egter toegelaat dat trots ’n houvas op sy lewe kry toe hy by die Babiloniërs met sy weelde en besittings begin spog het en vergeet het dat dit ’n genadegawe uit God se hand is. Hiskia se seun Manasse is ook in hierdie tyd gebore. Hy het afgode gedien en het ’n ernstige straf oor die volk gebring. Sou Hiskia beter af gewees het as sy lewe nie verleng is nie? Heel moontlik.

      Waarvoor smeek jy God vandag? Soms moet ons ons aan die woorde in Psalm 46:11–12 herinner: “Bedaar en erken dat Ek God is, hoog bo die nasies, hoog bo die aarde. Die Here, die Almagtige, is by ons, die God van Jakob is vir ons ’n beskutting.”

      Wanneer slegte dinge oor ons pad kom, is ons geneig om God te bevraagteken. Is dit nie eerder tyd dat ons Hom daarvoor moet dank nie? Onthou, Hy verander nooit nie. Hy bly ’n God van liefde wat jou oneindig liefhet en wat jou wil beskerm. Waar ons nou net gedeeltelik sien, sien Hy die volle prentjie. Kom ons bedaar dus en herinner ons daaraan dat Hy gister, vandag en tot in ewigheid dieselfde is. Kom ons dink daaraan dat al maak dinge nie nou sin nie, ons eendag alles sal verstaan wanneer ons die volle prentjie sien soos Hy dit sien. Sterkte.

      Gebed

      Vader God, baie dankie dat U die toekoms ken en my daagliks wil beskerm. Help om my te bedaar en opnuut te besef dat U God is. Ek vra dit in die Naam van Jesus Christus. Amen.

      Besprekingsvrae

      1 Was jy al in ’n situasie waar jy vrae aan God gestel het oor ’n moeilike gebeurtenis in jou lewe? Hoe het jy dit hanteer?

      2 Hoe het jou perspektief oor die situasie verander as jy nou terugkyk?

      3 Lees 1 Korintiërs 13:12. Wat beteken hierdie teksvers vir jou?

      4 Lees Psalm 46:11–12. Watter berusting bring hierdie teksvers jou?

      5 Hoe gaan jy in die toekoms anders kyk na uitdagende situasies, wanneer jy nie noodwendig antwoorde het om die situasies te verduidelik nie?

      7

      Oorkom jou vrees vir onbeantwoorde gebed

      Psalm 40:2–4

      Ek het gesmag na die hulp van die Here. Hy het na my toe afgebuig en my hulpgeroep gehoor. Hy het my uitgetrek uit die put van die dood, uit die slymerige modder, my op ’n rots laat staan en my weer op vaste grond laat loop. Hy het my ’n nuwe lied in die mond gelê, ’n loflied vir ons God. Baie sal daarvan hoor en Hom die eer toebring, hulle sal op die Here vertrou!

      Jeremia 32:27

      Ek is die Here die God van al die mense. Is iets vir My onmoontlik?

      Daniel 3:17–18

      Ons het ons God vir wie ons dien. Hy het die mag om ons te red uit die brandende oond, en Hy sal ons ook red uit u mag. Selfs as Hy dit nie doen nie, moet u weet dat ons u god nie sal dien nie, die goue beeld wat u laat oprig het, nie sal aanbid nie.

      Ek het vroeër ’n e-pos van ’n leser ontvang wat skryf: “My hart voel absoluut dood. Geen emosie; net ’n hart wat klop.”

      Is dit hoe jy vandag voel? Probeer jy met al jou krag vorentoe beweeg, maar dit is asof ’n onsigbare muur jou stuit? Of dalk probeer jy die verlede terugdraai sodat jy jou vorige besluite kan verander, maar ook daar is ’n muur wat jou keer? En om dinge te vererger, voel dit asof jy in ’n modderige put staan met mure wat die lewe en vreugde finaal uit jou pers?

      Dít is hoe Sadrag, Mesag en Abednego moes gevoel het toe hulle voor die vuuroond gestaan het. Hulle het vir God standpunt ingeneem deur nie voor die afgode te buig nie, maar nou het hul dood hulle in die gesig gestaar. Of Abraham en Sara. Hulle het God se belofte vir ’n baba vertrou, maar was reeds verby die ouderdom wat dit menslik moontlik was om kinders te hê. En die vrou met aanhoudende bloedvloeiing. Sy het jare lank dokters besoek en gebid vir genesing, maar niks het gebeur nie.

      Wat is die krisis wat jou verlam? ’n Ongelowige huweliksmaat? ’n Finansiële krisis wat ál erger word? ’n Siekte? Slegte nuus wat jou tot in jou fondament skud? ’n Krisis by die werk waarvoor jy verantwoordelik gehou word? Of dalk die verlies van ’n geliefde wat verhoed dat jy vorentoe beweeg?

      In Psalm 40:2–4 herinner die psalmdigter ons daaraan dat God ons uit enige donker put kan trek: “Ek het gesmag na die hulp van die Here. Hy het na my toe afgebuig en my hulpgeroep gehoor. Hy het my uitgetrek uit die put van die dood, uit die slymerige modder, my op ’n rots laat staan en my weer op vaste grond laat loop. Hy het my ’n nuwe lied in die mond gelê, ’n loflied vir ons God.” En in Jeremia 32:27 sê God self: “Ek is die Here die God van al die mense. Is iets vir My onmoontlik?”

      Sadrag, Mesag en Abednego het nie geweet of hulle die vuuroond sou oorleef nie. Toe koning Nebukadnesar hulle konfronteer omdat hulle nie voor sy beeld buig nie, het hulle nogtans geantwoord: “Ons het ons God vir wie ons dien. Hy het die mag om ons te red uit die brandende oond, en Hy sal ons ook red uit u mag. Selfs as Hy dit nie doen nie, moet u weet dat ons u god nie sal dien nie, die goue beeld wat u laat oprig het, nie sal aanbid nie” СКАЧАТЬ