Op vlerke van geloof. Solly Ozrovech

Чтение книги онлайн.

СКАЧАТЬ God! Ja, ek sal weer vir Hom ’n loflied sing. Hy is my helper en my God! – Psalm 43:5

      Moet nooit vertroue verloor in die toekoms nie. Moet nooit die toekoms aan vandag meet nie. Wat jy vandag is, is grotendeels die resultaat van gister se denke en dade. Wat jy môre sal wees, word reeds vandag bepaal.

      Moenie tyd verkwis met nuttelose klaagliedere oor wat kon gewees het nie. Gaan met geloof en vertroue die toekoms tegemoet omdat jy jou allerbeste in “vandag” geplaas het.

      Moenie negatiewe gedagtes koester nie. Die grootste struikelblokke vir ’n toekoms vol beloftes is bitterheid, haat en jaloesie. Dit verlam jou optrede, verblind jou uitsig, belemmer jou denke en verhoed geestelike groei. Jy is die een wat moet besluit watter magte jou denke en optrede gaan bepaal. Gaan jy die uitdagings aanvaar met ’n positiewe geloof en vertroue, of gaan jy die eensame pad van negatiewe denke volg?

      Op die pad van geloofsvertroue hou môre en oormôre geen gevaar in nie, want God is by jou. In sy hande is jy veilig. Die opdraandes en steiltes sal nog daar wees, maar dit sal nie meer struikelblokke wees nie, eerder uitdagings.

      GEBED

      Vader, hervorm my denke sodat ek elke dag die stryd kan aanknoop met geloof in my hart en in die Naam van Christus.

      11 Maart

      Jou lewe is jou getuigskrif

      LEES Handelinge 4:8–15

      Die Joodse Raad was verbaas toe hulle Petrus en Johannes se vrymoedigheid sien, want die Raad het geweet dit is maar ongeleerde en eenvoudige mense … – Handelinge 4:13

      Vir mense wat die impak van die opofferende liefde van die Heilige Gees beleef, kan liefdadigheid die opwindendste en bevredigendste ervaring van hul ganse lewe wees.

      Mense wat jou hulp nodig het, is dikwels nie bewus van hul behoefte nie. Hul gees kan dalk gesluit wees vir elke invloed. Hulle kan sinies wees oor alles wat jy as heilig beskou en jou hulp met minagting bejeën. As jy toegewy is aan jou barmhartigheidstaak, kan jy maklik ontmoedig word deur hul gesindheid. Onthou egter dat daar onder die ontoeganklike uiterlike ’n gees is wat hunker na bevryding.

      Hierdie geestelike en verstandelike bevryding word nie bereik deur prediking en voorskrifte nie, maar deur só te leef dat jou optrede bo kritiek verhewe is. Dit skep by ander die begeerte om ook te besit wat jy geestelik besit.

      Die heel beste manier om iemand te “help” is deur ’n gehalte in jou lewe te hê wat hulle sal besiel om ook te word wat Christus bedoel het dat hulle sal wees. Dán vertoon jy ’n lewende getuigskrif tot eer van jou Meester.

      GEBED

      Here, dankie dat u Heilige Gees my leer dat die gehalte van my lewe belangriker is as al die woorde wat ek kwytraak.

      12 Maart

      Ons sal vertroos word

      LEES Jesaja 61:1–11

      Hy het my gestuur … om aan te kondig dat die tyd gekom het … waarop ons God … almal wat treur, vertroos. – Jesaja 61:1–2

      Smart is ’n werklikheid in ons bestaan. Daarom is dit vertroostend om te verneem van ons Heiland wat Self gely het: “Geseënd is dié wat treur, want hulle sal vertroos word” (Matt 5:4).

      Is daar nood en gebrek in jou huis? Hy het nie ’n plek gehad om sy hoof neer te lê nie (Luk 9:58). Het jou vriend jou teleurgestel? Sy vriende het Hom verraai en verloën (Luk 22:48, 58). Worstel jy met smart? Hy het in Getsemane geworstel oor die lydensbeker wat vir Hom voorlê (Matt 26:36–46). Ween jy oor die dood van ’n dierbare? Hy het geween by die graf van sy vriend Lasarus (Joh 11:35). Voel jy verlate, selfs van God? Hy moes aan die kruis sy Godverlatenheid uitsnik (Matt 27:46).

      In hierdie lewe is daar baie teenspoed, gebrek en sorge. Maar Christus kom met sy troos na ons toe: “Soos ’n moeder haar kind laat veilig voel, so laat Ek julle veilig voel” (Jes 66:13). Nie ver van Mara af nie lê Elim met sy twaalf fonteine en baie palmbome. Daar sal jy weer in vrede jou tent opslaan. Vertrou net op die God wat jou sál vertroos.

      GEBED

      Dankie, Here, dat U vir ons die Trooster gestuur het om vir ewig by ons te bly. Dankie dat my smart my leer dat dít wat ek verloor, nie tel nie, maar wel dít wat ek deur genade behou.

      13 Maart

      Hoe sal ek ooit my droefheid hanteer?

      LEES Job 2:1–10

      As ons die goeie van God aanvaar, moet ons nie ook die slegte aanvaar nie? – Job 2:10

      Om te rebelleer teen ons “ongelukkige noodlot” – soos ons dit soms verkeerdelik noem – is om teen God in opstand te kom. Die dood is deel van sy lewensplan vir ons. Daarom is gelowige aanvaarding daarvan ’n teken van geestelike volwassenheid.

      Om van God af weg te draai is om ons droefheid alleen te dra en dit lei tot wanhoop. Dit skep ’n verwydering tussen ons en God, want God kan ’n opstandige hart nie vertroos nie.

      God plaas nooit sy kinders in ’n vuuroond sonder dat Hy nie Self by hulle is nie. As jy nie iets leer en geestelik groei in tye van beproewing nie, is jou lyding slegs verlies. Die ervaring van duisende van God se kinders bewys dat hierdie juis die optimale groeityd in ’n mens se lewe kan wees – mits jy dit in die regte gesindheid deurworstel. Die enigste manier waarop die Christen sy droefheid kan erken en verwerk, is om die voorbeeld van Christus na te volg: Aanvaar die lewe kalm en moedig en buig met ’n vreeslose hart en ongeknakte rug onder die kruis in. Die bevryding lê in die wete dat die sin van die lewe anderkant Golgota en die graf gevind word.

      GEBED

      Verlosser, ek het nie al die antwoorde nie, maar ek het vir U en weet dat u liefde my nooit aan wanhoop sal uitlewer nie.

      14 Maart

      Om God se stem te hoor

      LEES Jeremia 18:1–17

      Maak jou klaar en gaan af na die huis van die pottebakker, en daar sal Ek jou my woorde laat hoor. – Jeremia 18:2, 1953-vertaling

      Vir baie mense is dit ’n wesenlike probleem om te weet wat die wil van God vir hul lewe is. God maak egter op sy tyd en sy manier sy wil aan ons bekend. Dit gebeur dikwels op die mees onverwagte plekke en op die mees ongewone maniere, soos in die geval van Jeremia.

      Ons kan God se wil vir ons lewe soek deur ons van die wêreld te onttrek en al ons energie en denke op Hom te konsentreer. Ons kan die gewyde stilte en afsondering van ’n kerk of die natuur opsoek. Ons kan ons eie besondere plek hê waar God in die verlede dikwels vir ons ’n werklikheid geword het.

      Die hoofsaak is egter dat God Homself openbaar aan élkeen wat Hom soek – dit hang nie van ’n spesifieke plek af nie. God kan jou op enige plek en in enige omstandighede ontmoet. Jeremia het by die pottebakkershuis na die stem van die Here gaan luister. Hoe kragtig het God nie in hierdie vreemde omstandighede met hom gepraat nie!

      As ons maar net sensitief en gehoorsaam is, sal ons onmiskenbaar die stem van ons God hoor.

      GEBED

      Ek dank U opnuut, Here, dat dit nie van tyd, plek of omstandighede afhang vir U om met my te СКАЧАТЬ