Ак фәрештә = Белый ангел. Рифат Сәлах

Чтение книги онлайн.

      Гаскәр булып Үткән килә,

      Кулларында – айбалта.

      Тәрәзәләр яна күктә,

      Әрнеп кенә ай бата.

      Гаскәр булып килә бүген

      Сызып ташланган Тарих.

      Таң кызының толымнарын

      Төн егетләре тарый.

      Гаскәр булып Үткән килә,

      Бүгенге тора карап.

      Җирдә ята Таңсылуның

      Толымы белән тарак.

      Пыяла савыт эчендә

      Бәргәләнә җәен.

      Саф суда да күрә алмый

      Бу дөньяның ямен.

      Җәеннәргә дәрья кирәк,

      Иң кимендә – Идел.

      Балык тәрәз каккан саен,

      Аһ өзелә күңел.

      …Безнең җан да җәен кебек,

      Безнең җан да – балык,

      Гүя пыяла савытта

      Яши безнең халык.

      Ватаныңны дошман әсир итсә,

      Нинди мәгънә яну ут булып?

      Чебен килеш тарих-пәрәвездән

      Чукынсаң да булмый котылып.

      Әсирлектә тәгам булмый инде.

      Зәгыйфьләнгән милләт, әйдә, бет!..

      Пәрәвезгә якын килми генә,

      Үз вакытын көтә әнкәбүт2.

      Җәйге кичләр күркәмрәк,

      Төннәре дә – ак төн!

      Күзләренә карап күкнең,

      Тагын ниләр әйтим?

      Ак төннәрдә могҗиза бар,

      Йолдызлар да серле.

      Алар беренче мәртәбә

      Ал кояшны күрде.

      Кояш офык иңсәсендә

      Хәл ала да ятып,

      Уяна: «Табигатьне дә

      Уятырга вакыт!»

      Әй, кешеләр, нинди йокы,

      Нинди төшләр сездә,

      Йоклар өчен җитмимени

      Язлар, кышлар, көзләр?!

      Җәйге иртә күркәмрәк –

      Бүләге ул Хакның.

      Ак төннәрне йоклый-йоклый

      Үткәрмә син, халкым!