Гунилгэн хохтолин. Группа авторов

Чтение книги онлайн.

      Тариптыдук хуктывундӯ бӣ Малтӯиндӯ гукча̄ниӈнам.

      Энин

      Неӈненӣ

      Багдарика̄н

      (улгур)

      Орон – тар дю̄ды̄ бэйӈэ̄. Нуӈан дэттӯ-дэ, агӣдӯ-да ӣндевкӣ. Орон девгэ̄н лавукта, турукэ. Багдама лавукта – тар багдама колобо, сиӈама лавукта – тар коӈномо колобо, тара бӣ эвэмӈӯдук6 до̄лдыча̄в.

      Орон аяткӯ бэлэмнӣ эвэнкӣдӯ. Орон гэрбиен хавалдя̄ктулӣн, анӈанӣлдулӣн ичэдэлӣн-дэ бӯвкӣл. Орон гэрбилин анӈанӣлдулӣ: сирӯ, иктэ̄нэ, е̄вка̄н, сачарӣ, нямӣ, эӈнэкэ̄н. Орон гэрбин хавалдя̄ктулӣн: угучак, нё̄рамнӣ, гилгэ. Эвэнкӣл орорди нулгиктэдевкӣл, булта̄дявкӣл.

      Миндӯ орорви а̄чир. Бӣ бикӣттӯ ӣндем. Тэ̄лӣ миндӯ орокон бихин – эвӣкэ̄н. Нуӈанман миндӯ энинми анӣча̄н. Ороко̄нми-эвӣкэ̄нми бӣ Багдарика̄н гэрбичэ̄в.

      Эхиткэ̄н бӣ эвӣкэ̄ндиви эӈнэм эвӣрэ. Бӣ компьютернаилди эвӣрди эвӣӈнэм. Ороко̄нми-эвӣкэ̄нми а̄кӣттӯв книжнай полкадӯ илгимадяран. Долболтоно бӣ Багдарика̄ндӯви гуниӈнэм: «Ая долбонӣт!», эрдэт ме̄лмӣ, нуӈандӯн гуниӈнэм : «Аяткӯ инэӈӣт!»

      Эвэнкӣлдӯ багдама орон – тар Сэвэк-орон.

      Минӈӣ эвэды̄ тӯрэ̄нми

      Аминми аямамат минэвэ эвэды̄ тӯрэ̄нмэ са̄да̄в алагӯча̄н. Тыкэ̄н гуниӈкин: «Эӈнэкэл сӣ мэ̄нӈӣви тӯрэ̄нми омӈоро, омӈодёӈо̄с, орор а̄чир о̄дяӈа̄тын!»

      Бӣ эниннунми, н экнилнунми дю̄дӯви тадук таткӣттӯ эвэды̄т тӯрэ̄чиӈнэм, урэдӯ (эгдэ̄ндӯ) мунӈӣ урикӣттӯвун упкачил бэел эвэдэ̄тчэвкӣл.

      Каникулил о̄рактын, бӣ аминнунми эниннунми-дэ эгдэ̄нтыкӣ СКАЧАТЬ