Uit die Beek 2015. Attie van Wijk

Чтение книги онлайн.

СКАЧАТЬ Woord op die harte van die kinders graveer,” het Martin Luther geskryf. “Daar is twee soorte opvoeding. Die een leer ons om ’n lewe te maak en die ander leer ons om te lewe,” sê James Truslow Adams. En die tweede is waarskynlik belangriker as die eerste.

      In vandag se gedeelte hoor ons God se antwoord op Dawid se gebed. Hy wil ons leer wat ons moet doen. Hy wil ons elke dag raad gee deur sy Woord en sy Gees, sodat ons mense van integriteit kan wees. Soos ’n onderwyser of besorgde ouer wil Hy nie net vir ons sê wat ons moet doen nie. Sy oog sal op ons wees. Hy wil kyk of ons reg gehoor het en of ons die regte ding reg doen. Hy los ons nie om maar self op te snork nie.

      Jy sal onthou dat ’n mens nie juis leer as iets aan jou opgedwing word nie. Maar as jy geesdriftig oor iets raak, leer jy vanself. Daarom leer ons beter deur iets te doen as deur iets te memoriseer. Wat was jou geliefkoosde vak op skool? Hoekom? Was dit oor die inhoud van die vak, of oor die onderwyser? Ek raai dit was die onderwyser. En as die Here jou onderwyser is en jy Hom liefhet, wil jy graag sy hart bly maak en geniet jy die les.

      GEBED: Here, leer my op u manier lewe.

      Lees vanaand in Psalm 33:1-11 waarom ons elke dag die Here kan loof en prys. Kan jy minstens agt redes raaksien?

      Maandag 16 Maart 2105 • Lees eers 1 Samuel 14:13-23

      God maak die onmoontlike moontlik

      Saul en die manskappe by hom het bymekaargekom en toe hulle by die geveg kom, was die Filistyne besig om onder mekaar te veg (14:20).

      GESELSVRAAG:

      Vertel van ’n onverwagte oorwinning.

      “Met die huidige stand van die ekonomie in Europa raak dit al moeiliker om afset vir ons vrugte daar te kry. Ons begin dus soek na nuwe markte wat nog besteebare geld het,” vertel ’n sakeman. En toe ontdek hy dat Sjina ’n groot en volhoubare mark is.

      Wie sou kon raai dat so ’n hopelose stryd onverwags kon omkeer? Net Saul en Jonatan het swaarde gehad (vgl 13:22). Die ander was waarskynlik met tuingereedskap en stokke gewapen (vgl 13:20). En toe klim Jonatan teen die steil rots uit en oorwin ’n goed gewapende peloton. Toe die ander Filistyne sien wat daar oorkant gebeur, begin hulle paniekbevange teen mekaar veg, veral toe daar nog boonop ’n aardbewing kom. Toe Saul en die ander manskappe by die geveg opdaag, sien hulle die Filistyne veg teen mekaar (vgl 14:20). Die oorlopers sluit toe by Saul-hulle aan, en selfs die bang Israeliete het kans gesien om die vlugtende Filistyne agterna te sit (vgl v 21-22). Ongetwyfeld kon net God so iets bewerk.

      Jy het ook hierdie week groot uitdagings wat jou in die gesig staar. Miskien voel jy vanoggend moedeloos. Jy weet nie wat jy nog kan doen om die saak te red nie. Het jy al daaroor gebid? Dalk het die Here hierdie week ook vir jou ’n groot verrassing.

      GEBED: Here, sonder U kan ons niks doen nie.

      Lees vanaand in 1 Samuel 14:24-32 hoe ’n pa se verkeerde besluit sy seun se lewe in gevaar gestel het.

      Dinsdag 17 Maart 2105 • Lees eers 1 Samuel 14:33-41

      Soek die sondebok

      Kom hiernatoe dat julle kan uitvind en self sien wie vandag gesondig het (14:38).

      GESELSVRAAG:

      Wanneer wil jy graag iemand anders die skuld gee?

      “Nee, ek kan dit nie waag om vir die minister te gaan sê haar wetgewing is onprakties nie. Sy sal vra wie vir haar daardie dom dinge voorgestel het. Sy sal hom dan dadelik afdank,” het die amptenaar aan my verduidelik. In die politiek en ook in die sakewêreld soek ons alte graag na iemand op wie ons die skuld kan pak. Ons vergeet skoon om eerder na die probleem te kyk en dit te probeer oplos.

      Toe Saul nie antwoord van die Here kry oor sy onrealistiese bevele nie, soek hy dadelik ’n sondebok. Maar toe kom die onverwagte uitslag: Sy seun Jonatan, die held van die dag, word as die sondaar uitgewys. Hy sal dus doodgemaak moet word. So boemerang Saul se dom besluit weer.

      In die Afrikakultuur vind ons iets soortgelyks. As ’n mens siek word of in ’n motorongeluk beland, vra jy nie na die siekte of oorsaak van die ongeluk nie. Jy gaan na die toordokter om uit te vind wie jou getoor het. Iemand anders moet die skuld kry. En só word baie mense onskuldig vermoor net omdat hulle verdink word van toordery. Ons ander laai die skuld op die rekenaar wat gebreek het of die mense wat nie hul deel gedoen het nie. Wie sal dit waag om te erken hy of sy was verkeerd?

      GEBED: Here, help my om my verantwoordelikheid te erken.

      Lees vanaand in 1 Samuel 14:42-52 hoe die manskappe Jonatan se lewe gered het.

      Woensdag 18 Maart 2015 • Lees eers 1 Samuel 15:1-11

      Die volgende toets

      Saul en die manskappe het Agag gespaar en ook die mooiste kleinvee en beeste, die vetstes, en die lammers en alles wat mooi was (15:9).

      GESELSVRAAG:

      Hoekom skryf ons soveel toetse op skool?

      “As jy nie meet nie, sal jy nie weet nie,” is ons geleer in strategiese beplanning. ’n Mens kan goeie doelwitte hê en die regte besluite neem, maar beheer moet daaroor uitgeoefen word. Daarom stel jy meetbare doelwitte. Jy moet teen ’n sekere datum iets voltooi hê. Dit help ook om vir jou tussentydse doelwitte te stel sodat jy kan sien of jy op koers is. Dit gebeur ook op skool. Die onderwyser weet nie of hy suksesvol onderrig gee as hy dit nie gereeld toets nie.

      Saul het weer ’n toets gedop. Hierdie keer het hy ’n groot leër tot sy be­skikking gehad. Sy opdragte was duidelik. God se genade met die Amalekiete het tot ’n einde gekom. Nou sou hulle met God se geregtigheid te doen kry. Maar weer was Saul net deels gehoorsaam. Hy het die koning gespaar en ook die beste van die vee en ander dinge. God weet alles. Hy het dit aan Samuel geopenbaar. Jou sonde sal nie ongestraf bly nie.

      God is met ons elkeen op pad. Hy wil ons dinge van die geloofslewe leer en ons toerus as bruikbare instrumente in sy hand. Daarom toets Hy ons van tyd tot tyd. Dit is nie omdat Hy nie weet waar Hy met ons staan nie, maar dat óns kan besef hoe ons vorder.

      GEBED: Dankie dat U vir my wil wys hoe ek geestelik vorder, Hemelvader. Moet asseblief nie moed opgee met my nie.

      Lees vanaand in 1 Samuel 15:12-23 hoe die vee Saul tot leuenaar gemaak het en wat die gevolge vir hom was.

      Donderdag 19 Maart 2015 • Lees eers 1 Samuel 15:24-35

      Genadetyd gaan verby

      Tot die dag van sy dood het Samuel nie weer vir Saul gesien nie (15:35).

      GESELSVRAAG:

      Wat doen jy as jy verkeerd gedoen het?

      “Ek is jammer dat jy dit so opneem, maar …” begin baie van ons pogings tot konflikoplossing. Ons sê mos ons is jammer, al bedoel ons dit nie. Ons probeer verskoning maak vir wat ons gedoen of gesê het. Ons regverdig onsself, soos koning Saul in die gedeelte wat ons saam gelees het. By die skool en by die huis leer ’n kind gou om verskonings te versin. Maar dit gaan nie daaroor of jy daardeur baat nie, maar wat jy daardeur word.

      Samuel was teleurgesteld dat Saul, die belowende jong koning, nie die toetse geslaag het nie. Hy was nie kwaad vir Saul nie. Hy het oor hom getreur (vgl 16:1). Saul het sy sonde al so vlot bely dat hy dit СКАЧАТЬ