Flenters. Paulina Carolina du Plessis

Чтение книги онлайн.

СКАЧАТЬ

      

      Flenters

      Hoe omgee lewens kan verander

      Lina du Plessis

      Lux Verbi

      OPGEDRA AAN

      My kinders Jens, Pierre en Rialette, my twee kosbare kleinkinders Noa en Luther, al my pleegkinders, klein Poni en elke wees- en verontregte kindjie in Suid-Afrika.

      Voorwoord

      Lina du Plessis is een van daardie juweelmense wie se vingerafdrukke lewenslank op jou hart bly. Sy is ’n merkwaardige dame: vol grasie, waardigheid, omgee, empatie, ontferming, blydskap … Jy noem daardie kosbare deugde, en Lina het dit. Haar lewe is ’n lewende simfonie van God se spesiale goedheid. In die jare dat ek Lina nou al ken, skitter haar liefde veral vir eenkantmense. Elke keer wanneer ek haar raakloop by ’n Bybelskool- of kuiergeleentheid volg daar ’n kuierkamer vol nuwe verhale oor die afvlerkvoëltjies oor wie sy haar ontferm. Wat ’n juweel in die koninkryk! Sy praat, leef en doen die Here se soort lewe dag ná dag.

      Een van die merkwaardige dinge wat week ná week op my radar­skerm aanwesig is, is Lina se skryfkuns. Sy het ’n spesiale gawe om met ’n pen te kommunikeer; daarom is sy die afgelope paar jaar reeds ’n getroue medewerker van ekerk, ons groot webwerf/internetkerk en virtuele kuierplek vir derduisende mense wêreldwyd. Hier het Lina vir haar ’n fenomenale staanplek los geskryf. Nie net verstaan sy die moeisame roetes van skryf nie, sy begryp veral ook die roetes na mense se hart. Dis waarom sy so ’n geliefde en gewaardeerde medewerker van ekerk is.

      Nadat Lina onlangs ’n belangrike stuk nagraadse studie afgehandel het (wat baie wyer as Suid-Afrika se grense erkenning gekry het), het sy haar hand aan die skryf van ’n boek gewaag. Jy het die eindproduk hier in jou hand. Dit vertel vanuit baie hoeke die aangrypende verhale van God se goedheid om by flentermense te kom kuier en vir hulle goed te wees. Hierdie boek bied nuwe insigte oor God wat jou sprake­loos gaan laat en wat jou gaan aanspoor om ons hemelse Vader op nuwe maniere te dien.

      Stephan Joubert

      Engele baklei ook

      Toe ons kinders was, het ons elke Desember die Kersverhaal opgevoer. Dit was groot pret en terselfdertyd ’n baie ernstige saak.

      So besluit ek eendag om ’n regte Kerskonsert te hou by die Roomse skool vir bruin dogters waar ek onderwys gegee het. Dit was ’n buitelugkonsert, let wel. Die skool is op terrasse gebou en die “konsertsaal” was op die terras waar die netbalbaan is. Die onderste terras was backstage, waar die engele aangetrek het. Maria, Josef, die herders en die wyse manne (en Jesus!) het ná elke toneel agter die motors wat langs die verhoog parkeer was van kostuum verwissel. Die wardrobe het bestaan uit handdoekhooftooisels en lakens vir klere. Daar was nie ’n begroting vir die projek nie; ons moes kreatief dink!

      Die “saal” was gepak. Ouers, kinders en nonne – priester inkluis – het met groot afwagting na die verhoog gekyk. Dié het bestaan uit ’n paar hooibale en ’n groot blink ster wat aan die skewe, geroeste doelpaal geskitter het.

      Net voor die konsert begin, hardloop ek af om te kyk of die sowat vyftig engele gereed is om hul verskyning te maak. Tot my skok en verbasing was ’n klompie van die engele in ’n hewige geveg betrokke. Met woorde wat ek nie kan herhaal nie, het hulle mekaar geskel dat die spoeg spat. Hulle het mekaar letterlik aan die hare beetgehad.

      Die rede vir die geveg? Van die kinders het vir een van die engele, ’n meisie met ’n baie ligte gelaatskleur, gesê sy is ’n boer. Onthou, dit was 1986. Die arme kind se tinsel-stralekransie het skuins oor haar gesig gehang en haar engelgewaad was byna aan flarde geskeur soos sy terugbaklei het. “Liewe genade! Wat gaan met julle aan? Dis ’n Kerskonsert ter herdenking van Jesus se koms en als,” probeer ek by die politiek verby die vrede herstel. Die konsert moes begin.

      Hulle het so gegil, ek dink nie hulle het my gehoor nie. Ek het dit sterk oorweeg om die aartsengel Migael in te roep om te kom help, maar net Gabriël was daar … Dit gaan mos oor Jesus se geboorte.

      ’n Rukkie later stap die vegtende groepie engele, nog redelik dikbek, met hul brandende kerse deur die gehoor na die verhoog se kant toe. Party lyk darem soos engeltjies. Maar op pad na die verhoog toe kom ’n lastige wind op en waai feitlik al die kerse dood. Ag nee! Wat gaan nou nog verkeerd loop? Die hele scene van lig wat die donker uitdryf, was daarmee heen.

      Gelukkig hou ’n paar van die engele kop. Toe hulle in ’n halfmaan voor die staltoneel staan, begin hulle mekaar se kerse aansteek terwyl Boney M se “Joy to the World” die someraand en ons harte vol maak. Die gehoor was doodstil; dit was aangrypend. Die Lig van die wêreld het gekom om aangegee te word en om te bly, ook vir vegtende engele wat daardie aand verby die landspolitiek vir Jesus gesien het.

      Dit neem my terug na die begin. Terug na Genesis 1:2-4 waar daar staan: “Voor die skepping was alles eensaam en verlate. ’n Angswekkende donkerte het oor die bodemlose dieptes gehang. En ’n ongelooflike sterk wind het heeltyd oor die waters gewaai. God was egter daar en Hy het gesê: ‘Laat daar Lig wees. Skielik was daar oral lig.’ ”

      Wees lig, al baklei jy soms jou stralekransie skeef op jou kop.

      Afrika is nie vir sissies nie!

      Ek hoor so dikwels tydens konsultasiesessies en in werksessies wat ek aanbied dat mense se droom vir hul bediening is om in Afrika (en dan sommer die hele Afrika) te werk. Ek het ook so gesê … totdat ek in Junie 2006 in die village Migowi sowat negentig kilometer van Blantyre in Malawi tydens ’n konferensie letterlik en figuurlik grond toe gebring is.

      Die eerste dag nadat ek daar aangekom het, besoek ons ’n weeshuis, kleuterskool en ’n gemeente in die township Bangwe in Blantyre. Die toestand van die skooltjie en die weeshuis was haglik. Dit was baie, baie vuil, maar ek het al geleer dat kos ’n groter prioriteit as Handy Andy is. Dié middag het ons saam met ’n voorbiddergroep die Here geloof en prys op die ritme van ’n trommetjie wat van beesvel gemaak is. Wat ’n belewenis! Daardie aand eet ons ’n feesmaal bestaande uit vreemde, soutlose pap, die een of ander groen blaargroente en ’n klein bietjie vleis. Ons sit om ’n koffietafeltjie saam met pastoor Patric, sy vrou, Blessing, hul baba, Favour, en twee gemeentelede in hul baie, baie klein huisie wat propvol Jesus-liefde en vreugde is. Ek het nog nooit soveel vreugde en blydskap in mense beleef nie.

      Ná ete escort (soos hulle sê) die hele groep (babas en al) ons deur die donker township na die taxi-staanplek. Ons stap al laggende en geselsende deur gate en slote in die donker Afrika-nag. Ons enigste lig is ons selfone. Ek kyk op na die sterre terwyl ons vir die taxi wag en sien die Suiderkruis. Dis God se sterre wat Hy by die naam ken (vgl Ps 147:4, 1983-vertaling). Die volgende oomblik word ons letterlik by ’n taxi ingedwing. Nou verstaan ek die spreekwoord wat sê daar is altyd plek vir nog een, want sodra ons stilhou, klim nog een in, en nog een, en nog een.

      ’n Rukkie later, ná ’n woeste rit, word ons letterlik in die middestad van Blantyre op die sypaadjie uitgeboender, want ’n mens klim nie uit nie, jy foeter uit. Wat ’n ervaring! Here, dankie dat ek nie elke dag in ’n taxi hoef te ry nie. Dankie vir ’n motor.

      ’n Uur later stap ons in ’n ander township tussen rye padstalletjies, verlig deur flikkerende kersvlamme en klein vuurtjies. Almal probeer vir oulaas iets aan die verbygangers verkoop wat op pad huis toe is. Die gesigte van kinders, vroue en mans is dofweg sigbaar in die naglig. Ek verkyk my so aan die mense dat ek kort-kort struikel op die ongelyk pad.

      ’n Rukkie later lê ek uitgeput in ’n sagte bed met ’n potblou muskietnet wat soos ’n tent oor my gespan СКАЧАТЬ