Uit die Beek 2013. Attie van Wijk

Чтение книги онлайн.

СКАЧАТЬ Daar is geen orrel om die sang te oordonder nie. Ons kan mos nie meer harmoniseer nie. Almal sing dieselfde note. Of bly saam stil!

      Kom ons neem ons voor om vandag die Here skaamteloos te loof, al sê of dink ander mense ook wat. Dit gaan nie oor wat die mense sê nie, want ons kom saam om God te loof. Hý is die middelpunt van die aandag, nie die mense nie. Ons gaan nie kerk toe om vermaak te word nie, maar om te aanbid.

      GEBED: “Here, gee ons vandag ’n ware ontmoeting met U.”

      Lees vanaand in Psalm 81:12–17 hoe mense God se seën misloop deur hul ongehoorsaamheid.

      MAANDAG 14 JANUARIE 2013

      Lees eers Genesis 11:10–32

      Die Messias se voorgeslagte

      “Sarai was onvrugbaar; sy het nie kinders gehad nie” (Gen 11:30).

      GESELSVRAAG: Wat omtrent jou voorgeslagte maak jou bly?

      “Ai, ek is so jammer dat ek nooit my ouers en grootouers oor die voorgeslagte uitgevra het nie,” sê iemand nou die dag. Dit is so interessant om te weet wie jou voorgeslagte is en wat hulle gedoen het. Vir my was dit hoogs interessant om die spoor van die Van Wijks terug te neem tot 1620 toe die vroegste bekende Adriaan in Wijk by Duurstede in Holland gebore is.

      “My voorouers was uit die Franse adel in die vyftiende eeu,” spog ’n hoogmoedige vrou. “En joune?” “Nee, ek is bevrees ons rekords het met die sondvloed verlore gegaan,” antwoord haar vriendin met ’n glimlag.

      Genesis 1–11 is die voorspel vir God se werk met mense. Ons het vandag van Abram gelees, en hy is die voorvader van Jesus, die Messias. Ons gaan nog baie keer oor hom lees, want die verbond wat God met hom gesluit het, geld tot vandag toe nog. As jy ’n gelowige Christen is, dan is jy ook ’n afstammeling van Abraham (Gal 3:9, 14, 29). Ons moet dus mooi oplet wat ons van Abraham sal leer, want hy is ons voorvader. Dit is van ons familie wat ons hier meer gaan leer! Dieselfde God wat met Abraham en Sara gewerk het, werk ook met ons en ons kinders. Kom ons loof Hom daarvoor! Hy wil ons en ons nageslag gebruik om die wêreld te verander. Niemand hoef kinderloos te wees nie, want ons kan mense help om kinders van God te word. Dan is ons hul geestelike ouers.

      GEBED: “Dankie dat U ook na my toe uitreik, liefdevolle Vader.”

      Lees vanaand Genesis 12:1–9 en let op die twee kante van die verbond wat die Here met Abraham gesluit het.

      DINSDAG 15 JANUARIE 2013

      Lees eers Genesis 12:10–20

      Vrees lei tot leuens

      “Waarom het jy my nie gesê sy is jou vrou nie?” (Gen 12:18).

      GESELSVRAAG: Wanneer raak ons so maklik oneerlik? Noem op.

      “Dis nie ek nie, dis Sussie,” sê ons kleinseun met ’n onskuldige gesiggie, al was hy die skuldige. Ai, die erfsonde darem! “Al loop die leuen ook hoe snel, die waarheid agterhaal hom wel,” sê die spreekwoord. “Dit is moeilik om te glo dat iemand anders die waarheid praat, as jy self in sy plek sou gelieg het,” het Henry Louis Mencken iewers geskryf. “Iemand wat glo ’n wit leuentjie is toelaatbaar, word gou kleurblind,” het iemand anders gesê.

      Selfs die geloofsheld, Abram, het ook maar sy swak oomblikke gehad. Hy was bang dat die Egiptenaars hom sou doodmaak ter wille van sy mooi vrou, en was selfsugtig genoeg om haar liewer op te offer om sy eie voordeel te verseker. Is dit hoe ’n geloofsheld maak? God het seker gemaak dat die waarheid uitkom. God haat leuens. Dit is een ding wat jou uit die hemel sal hou (Op 21:8).

      Ons moenie vir Abram so gou veroordeel nie. Wie van ons kan eerlik sê dat ons nog nooit ’n leuen vertel het nie? As jy dít sê, is dit beslis ’n leuen. Praat jy net die hele waarheid as jy iemand anders bespreek? Erken jy jou skuld as die verkeerskonstabel jou voorkeer? Vul jy jou inkomstebelastingvorm pynlik eerlik en volledig in? Is jy altyd eerlik teenoor jou lewensmaat of jou kinders? En as jy jou ou skedonk wil verkoop? Kom ons wees vandag op ons hoede vir die versoeking van leuentaal.

      GEBED: “O God van waarheid, bewaar my van leuens.”

      Lees vanaand in Genesis 13:1–11a hoe Lot se selfsug hom in die gevaarsone laat beland het.

      WOENSDAG 16 JANUARIE 2013

      Lees eers Genesis 13:11b-18

      Nader al nader ...

      “ ... tot by Sodom het hy gaan tent opslaan” (Gen 13:12).

      GESELSVRAAG: Hoeveel kan ’n mens drink voor jy ’n alkoholis word?

      “Ag, kom nou! Hoe kan jy teen dwelms praat as jy dit self nog nie eens een keer probeer het nie? Enetjie doen tog nie skade nie,” word ons kinders wysgemaak. En een keer se gebruik van tik is genoeg om ’n kind verslaaf te maak en breinskade aan te rig. Elke alkoholis of dwelmslaaf het begin by die eerste sopie, of daardie zol wat die rondte gedoen het. Dit lyk so onskuldig, maar die uiteinde is verskriklik.

      Lot het ook gedink dat die Jordaanvallei die beste plek was om te woon. Hy was skatryk en het baie vee gehad. Jou rykdom moet mos geniet word. So lees ons dat hy al nader aan die groot stad Sodom getrek het, tot sy tent langs die stad gestaan het. Die volgende wat ons lees, is dat hy in Sodom woon (Gen 19:1–2). Hy het daar tuis gevoel. Dit het hom uiteindelik alles gekos – sy besittings, sy vrou, sy dogters en sy selfrespek.

      Wat is die naaste wat ’n mens aan ’n afgrond kan kom voor jy afval? Hierdie soort kompetisie eindig onvermydelik in ’n ramp. Ons gesin het jare gelede besef dat daar net een manier was om nie aan alkohol verslaaf te raak nie, en dit is om dit te vermy. En dit het vir ons duisende rande gespaar! Hoeveel “onskuldige” flirtasies het uiteindelik in die egskeidingshof geëindig! Wees op jou hoede, en vermy plekke van versoeking ten alle koste.

      GEBED: “Here, hou my tog ver van die versoekings af weg.”

      Lees vanaand in Genesis 14:1–12 wat die eerste skade vir Lot was omdat hy in Sodom gaan woon het.

      DONDERDAG 17 JANUARIE 2013

      Lees eers Genesis 14:13–24

      Op pad na die Messias

      “Toe het Abram vir Melgisedek ’n tiende van alles gegee” (Gen 14:20).

      GESELSVRAAG: Wat kan ons vandag doen om die Here te plesier?

      “As jy wil weet waarheen die Here met jou op pad is, help dit soms om terug te kyk op jou pad. Dink aan die bakens langs die pad. Hulle help jou om die regte rigting te vind.” Hierdie wenk van Henry Blackaby help ons ook om te verstaan waarheen die Bybel met ons op pad is.

      Vandag weet ons dat dit die wederkoms van Christus is, maar Abraham kon dit nie geweet het nie. Hierdie ontmoeting met die geheimsinnige Melgisedek is egter ’n leidraad wat ons uiteindelik by Christus sal uitbring. Al wat ons van hom weet, is dat hy die koning van Salem was, en ook ’n priester van God die Allerhoogste (v 18). Hy het vir Abram en sy troepe kos en wyn gebring (v 18). Hy het vir Abram geseën en Abraham het een tiende van die buit aan hom gegee. In Hebreërs lees ons weer van hierdie man. Daar word verduidelik dat hy die beeld van Christus, die finale hoëpriester, was (Heb 7:1–28).

      Wat kan ons vandag saamneem op die pad om vir ons finale Melgisedek te gaan gee? Ons tiendes? Ja, maar baie meer as СКАЧАТЬ