Uit die Beek 2013. Attie van Wijk

Чтение книги онлайн.

СКАЧАТЬ

      “U het my tog beloof: Ek sal beslis goed doen aan jou, Ek sal jou nageslag so baie maak soos die sand van die see, wat nie getel kan word nie” (Gen 32:12).

      GESELSVRAAG: Watter belofte van God het jou lewe verander?

      “Hoekom kry daardie taxibestuurder ’n goue huis terwyl ek net ’n gewone houthuisie kry?” wou die leraar by Petrus weet toe hy by die hemel inboek. “My broer, jou preke het mense aan die slaap gesus, terwyl sy bestuursvermoë baie mense leer bid het,” kom die antwoord. Hierdie grappie illustreer die feit wat in vandag se Skrifgedeelte weer uitgekom het. Dit is eers as ’n mens regtig in gevaar is, dat jy begin om ernstig te bid.

      Al Jakob se sondes het nou op sy kop teruggekom. Hy het soos ’n skelm die pad gevat na Laban toe, en toe weer van Laban af. En nou hoor hy dat die broer vir wie hy so kwaad aangedoen het, met ’n gewapende mag op pad is na hom toe! Dit kan doodsake raak. En nou het Jakob net een uitvlug: die Here. Hy bely dat hy niks goeds verdien nie, maar hy herinner die Here ook aan sy beloftes. Die verbond met God is al seker ding waarop hy kon vertrou.

      Op watter belofte van God maak jy staat? Sy Woord is vas. Ons kan daarop vertrou. Ons moet sy beloftes memoriseer, sodat ons dit enige tyd kan onthou en gebruik. Ons verdien niks nie, maar God se Woord bly ewig staan.

      GEBED: “Here, U weet wat vandag wag. Dra my daardeur.”

      Lees vanaand in Genesis 32:13–23 hoe Jakob alles waaraan hy kon dink, gedoen het om Esau gunstig te stem.

      WOENSDAG 13 FEBRUARIE 2013

      Lees eers Genesis 32:24–32

      Volharding verander mense

      “Ek sal jou net los as jy my seën” (Gen 32:26).

      GESELSVRAAG: Wanneer is dit belangrik om te volhard?

      “Wenners gee nie bes nie,” word by ons ingedril op skool. Ons moet aanhou tot ons die vak of die sport baasgeraak het. Oefen, oefen, oefen daardie musiekstuk tot jou vingers die klawers outomaties vind. Daardie toonlere op die viool kan die luisteraars teen die mure uitdryf, maar dit is nodig as ’n mens die instrument wil bemeester. Doen daardie tikles oor en oor tot jou vingers die regte toetse druk sonder dat jy daaraan hoef te dink.

      Jakob het alles gedoen wat hy menslik kon, maar hy het besef dat hy God se hulp nodig gehad het. En daardie nag het hy met hierdie Man geworstel. Sommige mense reken dit was ’n engel (Hos 12:5), en ander dat dit God Self was (v 28). Was dit ’n worstelstryd, of was dit ’n gebedstryd? Vandag is ons nie meer so seker nie. Jakob was egter oortuig dat hy met God te doen gekry het (v 30). Kan ’n mens dan vir God oorwin? Seker tog nie. Maar God gebruik sulke tye van vrees en spanning om ons nader aan Hom te trek. Van nou af sou Jakob mank loop, maar hy het ’n nuwe naam gekry: Israel – prins van God (v 28).

      Gaan jy vandag deur ’n moeilike tyd? Byt vas! Die Here is daar by jou om jou te seën, al lyk die nag ook hoe donker. Hy wil vir jou ook ’n prins of prinses maak. Daarom laat hy sulke tye toe.

      GEBED: “Here, help my volhard tot ek u seën ontvang het.”

      Lees vanaand in Genesis 33:1–8 wat toe gebeur het by die eerste ontmoeting tussen Jakob en Esau.

      DONDERDAG 14 FEBRUARIE 2013

      Lees eers Genesis 33:9–20

      Om God te ken

      “Jakob het daar ’n altaar gebou en dit genoem: Die God van Israel is God” (Gen 33:20).

      GESELSVRAAG: Hoe het jy die Here leer ken?

      “Ken jy die Here?” was oom Hannes Joubert lief om vir rylopers te vra. Hy kon Zulu vlot praat. Hy het dan verduidelik dat daar twee maniere is om God te ken: van hoorsê, en dit verander nie juis jou lewe nie, of jy kan die Here persoonlik ontmoet, en dit verander jou lewe radikaal. Dan vra hy op watter manier sy gas die Here ken. So kon hy baie mense na die Here lei.

      Jakob se ontmoeting met die Here het nie net sy naam verander nie. Hy het nou die Here waarlik geken. Daarom wou hy die Here openlik aanbid waar hy ook al gewoon het. Die trek met die lammertjies en die kindertjies het langer geneem as wat Esau verwag het. Jakob het selfs hier ’n stuk grond gekoop omdat hy ’n lang ruk hier oorgestaan het. Een kommentaar wys daarop dat Dina slegs ses jaar oud was toe hulle hier gekom het, en hubaar was toe hulle daar weg is. Jakob het die plek genoem na die nuwe naam wat die Here vir hom gegee het. My God is God.

      Daar is baie oë wat ons dophou. Sien hulle dat ons Here waarlik God is? Het Hy werklik ons lewe verander? Kan jy ook sê: “Die God van Jannie of Sannie of Flip is God?” Mense moet weet wie dit is wat jou so anders gemaak het. Hulle moet sien dat jy die Here ken, respekteer en gehoorsaam.

      GEBED: “Here, U is my God. U is die enigste ware God.”

      Lees vanaand in Genesis 34:1–12 hoe Sigem sy verkragting van ’n meisie probeer goed maak het. Kan dit werk?

      VRYDAG 15 FEBRUARIE 2013

      Lees eers Genesis 34:13–31

      Moeilikheid

      “Julle het my in die moeilikheid gebring, want julle het my naam sleg gemaak by die mense van hierdie land” (Gen 34:30).

      GESELSVRAAG: Wat het jou al in groot moeilikheid laat beland?

      “Die moeilikheid met moeilikheid is dat dit gewoonlik as pret begin,” het ’n Amerikaner opgemerk. So baie motorongelukke en verwoeste lewens het begin by een drankie, of ’n ligte flikflooiery, of “onskuldige” dwelms. “As ek maar net vooraf geweet het,” begin meer as een treurmare.

      Sigem se probleme het begin met die tergery van die oulike meisie langsaan. Hierdie pret het op verkragting uitgeloop. Hy het haar steeds liefgehad en wou met haar trou. Maar dit het uiteindelik die lewens van hom, sy hele familie en al die mans wat by hulle gewoon het, gekos. Dina se slinkse broers het die manne uitgeskakel. En nou was hul pa weer in groot moeilikheid deur die ondeurdagte dade van sy kinders.

      Hoe kan ons moeilikheid vermy? “As jy die ou kon skop wat die oorsaak van die meeste van jou moeilikheid is, sal jy ’n week lank nie kan sit nie,” het Theodore Rooseveld by geleentheid gesê. Ons kry so maklik moeilikheid deur iets wat ons gesê of gedoen het, of nie gesê of gedoen het nie. Daarom het ons die Here elke dag nodig. Hy kan ’n wag voor ons mond sit, sodat ons op die regte oomblik niks sal sê nie. En ons voorbidding vir ons kinders kan hulle uit baie moeilikheid hou.

      GEBED: “Here, bewaar ons en ons kinders van onnodige probleme.”

      Lees vanaand in Genesis 35:1–15 hoe Jakob sy huisgesin gelei het terwyl hy in die moeilikheid was en wat toe gebeur het.

      SATERDAG 16 FEBRUARIE 2013

      Lees eers Genesis 35:16–29

      Kinders van hartseer

      “Maar Ragel was aan die sterf en terwyl sy haar laaste asem uitblaas, noem sy die seuntjie Ben-Oni” (Gen 35:18).

      GESELSVRAAG: Waarvoor is jy gewillig om te sterf?

      “My grootste droom is om eendag as martelaar ’n selfmoordbomdraer te wees,” vertel ’n pragtige dogtertjie in die Midde-Ooste by haar kinderklub. Dit is vir haar die grootste СКАЧАТЬ