Исповедь = Аһыллыы. Айсен Дойду

Чтение книги онлайн.

      О-о, бу тураахтыыр эбиккин!

      Аҕыс иилээх – саҕалаах

      далан дойдум тулааһына,

      кэтит дойдум биттэҕэ,

      айгыр – силик айхаллаах

      Аар Кудук Маспыт бэйэлээх,

      Алахчын Хотун иччилээх

      Орто дойдум тутааҕа!

      Амарахтыыр аймахтарга,

      урааҥхайдыыр сахаларга

      иитэр Ийэ – мас буолан

      туругурдаан турдаҕыҥ!

      Айбыт айыы аҕалаах,

      иэйэхситтиир ийэлээх,

      билэр–өйдүүр төбөлөөх,

      астык ааллаах атыырдаах,

      ирдиир – көрдүүр ыллыктаах,

      содуоллаһар суоллардаах,

      туруолаһар туруктаах,

      самнархайдыыр сайылыктаах,

      кыргыһыылаах кыстыктаах,

      кыайар – хотор хоннохтоох,

      албан ааттаах эр киһи!

      Тэтэркэйдиир имнэрдээх,

      имигэстэй илиилэрдээх,

      мэтэгэркээн түөстэрдээх,

      хойуу – субуй суһуохтаах,

      кылбаа көмүс ытарҕалаах,

      илин – кэлин кэбиһэрдээх,

      кылыгырыыр симэхтэрдээх

      саха аймах кэрэтэ,

      дьиэлээх кэргэн ийэтэ!

      Айыыһыттан айдаран,

      Иэйэхситтэн имэҥнэнэн

      кэргэниниин таптаһан,

      оҕолорун төрөтөн,

      саха дьонун элбэтэн,

      үөскүүрүгэр кыһаллан

      хотун дьахтар барахсан!

      Аламай күнүм анныгар,

      уйгу – быйаҥ дойдубар

      хайгыыр хотун дьахтарым

      уонна дохсун эр киһи

      көрсө түһэн – билсиһэн,

      төлөннөөхтүк таптаһан,

      хоонньохтоһон – холбоһон

      олохторун тэрийбиттэр,

      уйаларын оҥостоннор

      оһохторун оттубуттар,

      бур – бур буруо таһаарбыттар,

      элбэх оҕо төрөтөннөр,

      аймах – уруу үөскэтэннэр,

      далбар түөлбэ тэрийэннэр

      үөрэ – көтө олорбуттар!

      Күлүмнүүр күндү күннээх,

      дьэҥкир ыраас халлааннаах,

      унаар урсун уулардаах,

      күөхтүү хампа тыалардаах,

      дьоллоох дьоһун дьоннордоох,

      айгыр – силик бэйэлээх

      албан ааттаах Орто дойдум!

      Түһүлгэҕэр төннөммүн

      сэргэлэргин кууһабын,

      кэлбит кэми уруйдаан

      ахтар – таптыыр Алахчыммар

      ытык тоҕой саламаҕа

      маҕан кылбын ыйыыбын!

      Арыы түөлбэ алаастардаах,

      сытар сылам сыһыылардаах,

      сүөгэй сүүрэр сүөһүлэрдээх,

      кымыс сыттаах сылгылардаах

      далбар далан дойдубут.

      Манна ааннаан олорор

      Айыы СКАЧАТЬ